Karlarnir í efsta sæti deildarinnar

Mynd eftir A & R Photos úr fyrri leik liðanna

Mikil spenna ríkti fyrir þessum leikjum þar sem liðin voru í efstu tveimur sætunum fyrir þá og munaði aðeins einu stigi á þeim. Góð úrslit fyrir hvort liðið sem var þýddi því efsta sæti deildarinnar fyrir jólafrí. Ekki var síður mikil spenna fyrir leikjunum þar sem flestir leikir KA og HK hafa verið gríðarlega spennandi síðustu ár og margir farið alla leið í oddahrinu.

Fyrri leiknum lauk með 2-3 sigri HK þar sem okkar menn léku ekki sinn besta leik. Þeir áttu erfitt með að verja sóknir HK og duttu margir auðveldir boltar í gólfið. Hrinunum lauk 18-25, 25-22, 25-19, 22-25 og 11-15.

Síðari leiknum lauk með 3-1 sigri KA. Varnarvinnan var töluvert betri í þessum leik en móttakan var ekki eins góð og við erum vön að sjá hjá okkar mönnum. Hrinunum lauk 25-21, 23-25, 26-24 og 25-21.

Efsta sæti deildarinnar er því staðreynd þegar öll lið deildarinnar hafa lokið leik fyrir jól. KA er með 19 stig eftir 8 leiki og eins stigs forskot á HK og fjögurra stiga forskot á Stjörnuna. HK og Stjarnan hafa bæði leikið 9 leiki og eiga KA því einn leik til góða á bæði lið.