Áki og Martha best í handboltanum

Dagur, Martha og Ásdís með verðlaun sín

Lokahóf handknattleiksdeildar KA fór fram um helgina og ríkti mikil gleði á svæðinu enda tryggði bæði karlalið KA og kvennalið KA/Þórs sér sæti í deild þeirra bestu með frábærum árangri á nýliðnu tímabili. Eins og venja er voru þeir sem stóðu uppúr verðlaunaðir.

Hjá strákunum var Áki Egilsnes valinn besti leikmaður tímabilsins en hann var einmitt markahæsti leikmaður tímabilsins og var mikill stígandi í leik hans í vetur. Dagur Gautason var valinn sá efnilegasti en hann var algjör lykilmaður í KA liðinu í vetur þrátt fyrir að vera nýlega orðinn 18 ára.

Hjá stelpunum þá var Martha Hermannsdóttir valin besti leikmaðurinn en hún eins og svo oft áður fór fyrir liðinu sem vann öruggan sigur í Grill 66 deildinni og fór í undanúrslit Bikarkeppninnar. Ásdís Guðmundsdóttir var svo valin efnilegasti leikmaður liðsins en hún var frábær á línunni í vetur og leikur með U-20 árs landsliði Íslands.

Við óskum þeim að sjálfsögðu til hamingju með verðlaun sín og þökkum ykkur einnig öllum fyrir frábæran stuðning á tímabilinu og hlökkum svo til þegar handboltinn fer aftur af stað í haust.