KA/Þór lagði Hauka á Ásvöllum

Handbolti
KA/Þór lagði Hauka á Ásvöllum
Stelpurnar lokuðu á Haukana (mynd: EBF)

Það var krefjandi verkefni sem KA/Þór átti fyrir höndum er liðið sótti Hauka heim að Ásvöllum í Olís deild kvenna enda Haukum spáð góðu gengi í vetur og á toppnum eftir stórsigur í fyrstu umferð. Á sama tíma höfðu okkar stelpur tapað fyrsta leik gegn sterku liði Vals eftir erfiða byrjun.

Strax frá fyrstu mínútu varð hinsvegar ljóst að það yrði ekki endurtekning á leiknum gegn Val. Stelpurnar hófu leikinn af miklum krafti, þar sem liðið lék frábæra vörn og Olga í markinu stóð fyrir sínu. Liðið skoraði til að mynda 6 mörk úr hraðaupphlaupum og seinni bylgju í fyrri hálfleik og leiddi 13-15 er liðin gengu inn til búningsherbergja.

Í þeim síðari héldu stelpurnar áfram að leiða og gott betur því forskotið jókst og spilamennskan til fyrirmyndar. Er kortér lifði leiks var munurinn 4 mörk og útlitið ansi gott. Þá kom áhlaup frá heimastúlkum og náðu þær að jafna leikinn.

Á lokamínútunni voru Haukar með boltann og staðan jöfn, sem betur fer hélt vörnin og staðan snerist við. KA/Þór með boltann og í möguleika á að vinna leikinn. Þórunn Eva Sigurbjörnsdóttir fór á endanum inn úr hægra horninu en skot hennar fór í stöng og út, Ásdís Guðmundsdóttir á línunni var hinsvegar vel vakandi, hrifsaði frákastið og skoraði er 4 sekúndur voru eftir og sigurinn okkar.

Algjörlega frábær sigur staðreynd á sterku liði Hauka og það má sannarlega segja að þessi frammistaða sé yfirlýsing til allra liðanna í deildinni. Skrekkurinn sem var í liðinu í upphafi fyrsta leiks í vetur er svo sannarlega farinn og verður virkilega spennandi að sjá stelpurnar í komandi leikjum.

Það sem skóp sigurinn var klárlega frábær liðsframmistaða þar sem vörn og markvarsla lokuðu hreinlega á Haukana og gáfu þó nokkur hraðaupphlaup. Sóknarleikurinn er allur að koma til og hvetjum við að sjálfsögðu alla til að koma í KA-Heimilið þann 4. október þegar stelpurnar taka á móti ÍBV í næsta leik.

Mörk KA/Þórs: Martha Hermannsdóttir 7 mörk, Sólveig Lára Kristjánsdóttir 6, Ásdís Guðmundsdóttir 4, Hulda Bryndís Tryggvadóttir 3, Katrín Vilhjálmsdóttir 3 og Þórunn Eva Sigurbjörnsdóttir 1 mark.

Olgica Andrijasevic varði 16 skot í markinu.


Knattspyrnufélag Akureyrar  |  Dalsbraut 1 600 Akureyri  |  S. 462 3482 | Hafa samband