Mikilvægur heimaleikur á sunnudaginn

Við þurfum á þér að halda! (Mynd: Sævar Geir)

KA tekur á móti Leikni Reykjavík á Akureyrarvelli á sunnudaginn klukkan 16:00 í 17. umferð Inkasso deildarinnar. Þetta er gríðarlega mikilvægur leikur fyrir bæði lið enda stutt eftir af deildinni og skiptir því hvert stig miklu máli.

Í síðustu umferð gerði KA 0-0 jafntefli í Keflavík sem þýðir að enn hefur liðið 7 stiga forskot á næsta lið í baráttunni um sæti í efstu deild. Á sama tíma skutust Grindvíkingar upp í efsta sæti deildarinnar með öruggum 0-3 sigri á einmitt Leiknismönnum.

Leiknismenn eiga enn möguleika á að komast upp í deild þeirra bestu og er leikurinn á sunnudaginn stóri möguleiki þeirra til að halda þeim vonum á lífi. Það er því ótrúlega mikilvægt að við mætum öll á völlinn og sjáum til þess að strákarnir sem hafa verið frábærir í sumar haldi áfram á réttri braut og komi sér í enn betri stöðu þegar 5 leikir verða eftir af deildinni, áfram KA!