Bikarmeistarar í blaki 2015 - myndir

Almennt | Blak

KA varð bikarmeistari karla í blaki árið 2015 með 3-1 sigri á HK á sunnudaginn en HK hafði unnið bikarinn síðustu tvö ár.

KA byrjaði leikinn frábærlega, komust meðal annars í 5-1 eftir að Piotr hafði sent þrjár uppgjafir beint í gólf hjá Kópavogsliðinu. HK rankaði þá við sér og komst yfir, meðal annars í 13-10. KA menn reyndust þó sterkari og unnu fyrstu hrinuna, 26-24.

KA vann einnig hrinu tvö sem spilaðist á svipaðan hátt og sú fyrsta. Eftir góða byrjun KA manna komst HK yfir um miðja hrinuna, en aftur reyndust KA-menn sterkari á lokasprettinum og unnu hrinuna 25-23.

Stigi fagnað á sunnudaginn
Mynd: Eva Björk Ægisdóttir

HK liðið vaknaði til lífsins í þriðju hrinu og vann hana með fjórum stigum, 25-21.

KA tryggði sér svo bikarmeistaratitilinn árið 2015 í fjórðu hrinu þar sem þeir létu forystuna aldrei af hendi. KA vann hana 25-21, en Ævarr Freyr Birgissonar innsiglaði sigurinn með flottu smassi í lokin.

Filip Szewczyk, þjálfari og uppspilari KA átti frábæran leik og var valinn besti maður úrslitaleiksins af sérstakri dómnefnd Blaksambandsins.

Þetta er í sjötta sinn sem KA vinnur bikarinn, en HK hafði unnið titilinn síðustu tvö ár. Lið KA var þannig skipað: Einar Oddur Jónsson, Marteinn Möller, Vigfús Jónbergsson Hjaltalín, Benedikt Rúnar Valtýsson, Hilmar Sigurjónsson, Filip Szewczyk, Valþór Ingi Karlsson, Hristiyan Dimitrov, Ævarr Freyr Birgisson, Piotr Kempisty, Kristinn Björn Haraldsson.

Vegna ófærðar komust KA menn ekki heim fyrr en á mánudag og var móttökuathöfn í KA heimilinu þar sem meisturunum voru færð blóm og veitingar fyrir gesti. Hilmar Sigurjónsson, fyrirliði kom þó ekki með norður en hann er búsettur á Laugarvatni sem stendur.

Bikarmeistararnir 2015 komnir heim
Mynd: Þórir Tryggvason

Hér er hægt að skoða myndir, bæði úr Laugardalshöllinni á sunnudaginn og frá móttökunni í KA heimilinu á mánudaginn.

Í undanúrslitunum á laugardaginn vann KA öruggan 3-0 sigur á Þrótti Neskaupstað. Hér er hægt að sjá myndbrot frá þeim leik og þar fyrir neðan er viðtal við Hilmar fyrirliða eftir undanúrslitaleikinn.

 


Frá undanúrslitaleik KA og Þróttar Nes á laugardaginn


Viðtal við Hilmar Sigurjónsson fyrirliða eftir undanúrslitaleikinn á laugardaginn


Knattspyrnufélag Akureyrar  |  Dalsbraut 1 600 Akureyri  |  S. 462 3482  | blak@ka.is