Annar sigur KA á N1 mótinu kom sumarið 1991

Árið 1991 endurtók KA leikinn frá árinu 1988 og vann sigur á N1 mótinu sem þá hét Esso-mótið. Að vísu gerðu KA strákarnir enn betur því bæði vannst sigur í keppni A-liða og D-liða og var þetta því annar sigur KA á mótinu sem fyrst fór fram sumarið 1987. Þjálfari strákanna var Jóhannes Gunnar Bjarnason.

Alls kepptu 35 lið á mótinu sem var þá það stærsta í sögunni. Í dag keppa hinsvegar yfir 200 lið á mótinu og virðist stækkun mótsins engan enda ætla að taka. Fyrsta helgin í júlí, þegar N1 mót KA fer fram, hefur einmitt verið stærsta ferðahelgi ársins á Akureyri undanfarin ár.

Á myndinni hér fyrir ofan má sjá sigurlið KA í flokki A-liða.
Efri röð frá vinstri: Jóhannes Gunnar Bjarnason þjálfari, Hafþór Einarsson, Hlynur Erlingsson, Jóhann Hermannsson, Heimir Örn Árnason og Atli Sveinn Þórarinsson.
Neðri röð frá vinstri: Jóhann Traustason, Sigurður Guðmundsson, Hans Hreinsson, Axel Árnason, Eiríkur Karl Ólafsson og Þórir Sigmundsson.

En eins og fyrr segir voru KA-menn sigursælir á mótinu 1991 en ekki nóg með að vinna sigur í keppni A og D liða þá urðu B og C lið félagsins í 3. og 4. sæti í sínum keppnum. Gunnar Kárason var formaður unglingaráðs KA á þessum tíma og var hann hæstánægður með mótið. Framkvæmdin hafi gengið vel, menn voru heppnir með veður en skemmtilegast væri góður árangur KA á mótinu, ekki síst í A-liðum.

Heimir Örn á fullri ferð í úrslitaleiknum gegn Víkingi

Strákarnir í A-liðinu léku til úrslita gegn liði Víking og sigruðu 1-0 í spennandi leik. Það var Heimir Örn Árnason sem skoraði sigurmarkið úr þröngri stöðu og var vel fagnað af félögum sínum og fjölmörgum áhorfendum sem fylgdust með. Áður höfðu strákarnir unnið 3-1 sigur á Stjörnunni í undanúrslitunum.

Í keppni B-liða lagði KA Víking 2-0 í leiknum um þriðja sætið. C-lið KA þurfti hinsvegar að sætta sig við 0-3 tap gegn FH í leik sínum um þriðja sætið. Í keppni D-liða var keppt í fimm liða riðli og þar hlutu KA-menn flest stig og hömpuðu því bikarnum.

Axel Árnason fyrirliði KA og Heimir Örn sem skoraði sigurmarkið í úrslitaleiknum

Gaman að skora sigurmarkið

"Mér líður mjög vel og það var rosalega gaman að skora sigurmarkið," sagði Heimir Örn Árnason, leikmaður með A-liði KA, sem skoraði sigurmarkið í úrslitaleiknum gegn Víkingi.

"Ég fékk boltann á kantinum og sá að enginn var inn í og skaut því bara á markið. Þetta var ekkert sérstakt færi og sennilega var ég svolítið heppinn að skora. Mér hefur gengið ágætlega að skora í sumar, er búinn að gera 10 mörk. Það var auðvitað frábært að vinna mótið og auðvitað erum við með besta liðið" sagði Heimir Örn.

Bestir en svolítið heppnir

"Mér líður alveg rosalega vel. Ég átti von á sigri í úrslitaleiknum enda ætluðum við að vinna allan tímann," sagði Axel Árnason, markvörður og fyrirliði sigurliðs KA.

"Ég myndi segja að sigurinn í úrslitaleiknum hafi verið sanngjarn. Þeir pressuðu reyndar svolítið í lokin en það var bara eðlilegt. Við vorum með besta liðið í þessu móti en vorum samt svolítið heppnir. Við unnum til dæmis riðilinn okkar á markatölu," sagði Axel Árnason.