4. flokkur KA Íslandsmeistari (myndir og myndband)

Íslandsmeistarar 2020! (mynd: EBF)

Strákarnir í 4. flokki gerðu sér lítið fyrir og unnu 3-2 baráttusigur í úrslitaleik Íslandsmótsins sem fram fór á Greifavellinum í dag og hömpuðu þar með sjálfum Íslandsmeistaratitlinum. Strákarnir sýndu mikinn karakter eftir að hafa lent undir og sneru leiknum sér ívil.

KA tók á móti Stjörnunni í leik dagsins en fyrir leikinn í dag voru Stjörnumenn ósigraðir í allt sumar og höfðu meðal annars unnið 6-2 sigur á liði KA. En það býr mikill karakter í strákunum okkar og þeir hafa bætt sig jafnt og þétt í allt sumar og þeir sýndu hvað í þeim býr á stóra sviðinu.

Leikurinn var í beinni útsendingu á KA-TV og hér er hægt að sjá mörkin úr leiknum

Það voru að vísu gestirnir sem náðu forystunni á 30. mínútu þrátt fyrir að KA hafi fengið nokkur úrvalsfæri. Strákarnir létu það hinsvegar ekki fá á sig og þeir voru ekki lengi að svara fyrir sig með marki aðeins tveimur mínútum síðar þegar Gabriel Lukas Freitas Meira kom boltanum í netið eftir mikið klafs í teignum uppúr aukaspyrnu. Staðan var því jöfn 1-1 þegar liðin gengu til búningsherbergja sinna.

Smelltu á myndina til að skoða myndir Egils Bjarna frá leiknum

KA tók svo forystuna strax í upphafi síðari hálfleiks eftir frábæra sendingu innfyrir vörn gestanna og Elvar Máni Guðmundsson renndi boltanum í netið af stakri snilld eftir að hafa leikið á markvörð Stjörnunnar. En gestirnir gáfust ekki upp og þeir jöfnuðu metin þegar Elmar Freyr Hauksson gerði sitt annað mark á 61. mínútu.

Aftur voru strákarnir hinsvegar snöggir að svara fyrir sig en þeir uppskáru vítaspyrnu tæpri mínútu síðar sem Dagbjartur Búi Davíðsson skoraði úr af öryggi og tryggði 3-2 sigur okkar liðs. Frábæru sumri hjá mögnuðu liði lauk því með þeim stóra og ekki spurning að þetta lið okkar á svo sannarlega framtíðina fyrir sér!

Smelltu á myndina til að skoða myndir Sævars Geirs frá leiknum

Íslandsmeistarar KA í 4. flokki 2020
Almar Örn Róbertsson, Andri Valur Finnbogason, Askur Nói Barry, Dagbjartur Búi Davíðsson, Dagur Árni Heimisson, Elvar Máni Guðmundsson, Gabriel Lukas Freitas Meira, Helgi Már Þorvaldsson, Ívar Arnbro Þórhallsson, Jóhann Mikael Ingólfsson, Konráð Birnir Gunnarsson, Magnús Dagur Jónatansson, Magnús Máni Sigursteinsson, Máni Dalstein Ingimarsson, Mikael Breki Þórðarson, Sigursteinn Ýmir Birgisson, Þórir Örn Björnsson, Valdimar Logi Sævarsson og Örn Ingvarsson.