Krefjandi leikur í Eyjum í dag (í beinni)

KA sækir þrefalda meistara ÍBV heim í Olís deild karla í handboltanum í dag. Liðin eru jöfn að stigum með 6 stig fyrir leikinn og má búast við hörkuleik en leikurinn er liður í 9. umferð deildarinnar. Leikurinn hefst klukkan 18:30 og verður í beinni útsendingu á ÍBV-TV.

Lið heimamanna er gríðarlega vel mannað en liðið hefur þó hikstað í upphafi tímabils og er töluvert neðar í töflunni en menn reiknuðu með. Það skildi þó enginn vanmeta Íslands-, Bikar- og Deildarmeistarana og eru þeir klárlega líklegri aðilinn í kvöld.

Nýliðar KA hafa byrjað tímabilið af miklum krafti og hafa allir leikir liðsins í deildinni verið hörkuspennandi og flottir fyrir utan einn leik. Liðinu var spáð neðsta sætinu í flestum spám fyrir tímabilið en það býr gríðarlegur karakter í liðinu auk þess sem strákarnir hafa sýnt mikinn aga.

Nú styttist í að deildin verði hálfnuð og ljóst að deildin fer að skiptast meira upp. Það eru því mikilvæg stig í húfi í kvöld, á sama tíma og heimamenn vilja reyna að koma sér nær toppbaráttunni þá vill okkar lið að sjálfsögðu spyrna sér lengra frá botnliðunum tveimur.