0-2 sigur á Stjörnunni í Garðabæ

Fótbolti
0-2 sigur á Stjörnunni í Garðabæ
Mynd - Kristinn Magnússon / mbl.is

KA gerði í dag góða ferð í Garðabæinn og sigraði Stjörnuna 0-2. Staðan í hálfleik var markalaus en KA liðið mætti frábærlega í seinni hálfleikinn og komst í 0-2 á fyrstu tíu mínútum hálfleiksins.

Stjarnan 0 - 2 KA
0 - 1 Ólafur Aron Pétursson (’50) Stoðsending: Hallgrímur Mar
0 - 2 Elfar Árni Aðalsteinsson (’55) Stoðsending: Ýmir Már

Lið KA:
Aron Dagur, Haukur Heiðar, Torfi Tímoteus, Hallgrímur J, Hrannar Björn, Ýmir Már, Almarr, Daníel, Andri Fannar, Hallgrímur Mar og Elfar Árni.

Bekkur:
Kristijan Jajalo, Ólafur Aron, Brynjar Ingi, Nökkvi Þeyr, Sæþór og Alexander Groven.

Skiptingar:
Ólafur Aron inn – Daníel Hafsteins út (’45)
Alexander Groven inn – Andri Fannar út (’46)
Sæþór Olgeirs inn – Elfar Árni út (’70)

KA mætti Stjörnunni í dag á Samsung vellinum í Garðabæ í 5.umferð Pepsi Max deildarinnar. KA gerði eina breytingu á liðinu frá tapinu gegn Breiðablik í síðustu umferð. Hallgrímur Jónasson kom inn í liðið. KA þurfti að gera breytingu á byrjunarliðinu skömmu fyrir leik þegar að Callum Williams meiddist í upphitun og kom Haukur Heiðar inn í liðið í hans stað. KA telfdi því fram alíslensku byrjunarliði og hefur það ekki gerst í háa herrans tíð.

KA hóf leikinn prýðilega og hélt boltanum vel innan liðsins og þreifaði fyrir sér. Það voru hins vegar heimamenn í Stjörnunni sem skoruðu mark eftir einungis sex mínútna leik þegar að Guðmundur Steinn skallaði fyrirgjöf í markið af stuttu færi en markið dæmt af þar sem boltinn var farinn aftur fyrir endamörk í fyrirgjöf þeirra.

Þegar að stutt var til hálfleiks munaði engu að Stjörnumenn brytu ísinn. Þá áttu Guðjón Baldvins og Hilmar Árni laglegan samleik sem lauk með því að Hilmar Árni skaut í stöngina úr upplögðu færi. Boltinn barst síðan aftur til Guðjóns sem átti skot að marki sem Aron Dagur varði. Undir lok hálfleiksins þurfti Daníel Hafsteinsson að fara af velli vegna meiðsla og í hans stað kom Ólafur Aron Pétursson. Enn ein meiðslin hjá KA í sumar og vonandi ekki alvarlegt hjá Daníel.

Heimamenn í Stjörnunni voru hættulegri seinni hluta fyrri hálfleiks en KA liðið var þétt til baka og staðan í leikhléi markalaus. KA liðið þurfti að gera breytingu í hálfleik vegna meiðsla en þá fór Andri Fannar út og koma Alexander Groven inn á í hans stað.

KA hóf seinni hálfleikinn af miklum krafti og eftir stuttan tíma áttu Groven og Hallgrímur flottan samleik á miðjunni sem lauk með því að Groven átti sprett upp vinstri vænginn og gaf fyrir á Ými sem framlengdi boltanum á Hrannar sem var í góðri stöðu út í teignum en skaut yfir markið.

Tveimur mínútum seinna fór Hallgrímur Mar illa með varnarmenn Stjörnunar úti við hliðarlínu hægra megin og átti flottan bolta fyrir markið sem Haraldur í marki Stjörnunar missti af í baráttu við Elfar Árna og endaði knötturinn hjá Ólafi Aroni sem skoraði af öryggi af stuttu færi og KA komið yfir eftir frábæra byrjun liðsins í síðari hálfleik.

Markið gaf KA liðinu sjálfstraust og hélt liðið uppteknum hætti og einungis fimm mínútum seinna áttu Elfar Árni og Ýmir Már frábært veggspil fyrir utan vítateig heimamanna sem endaði með því að Elfar komst einn gegn Haraldi í marki Stjörnunar og var yfirvegaður í færinu og kláraði færið framhjá honum KA komið í 0-2 eftir magnaða byrjun á seinni hálfleiknum.

Tíu mínútum seinna var þjálfara Stjörnumanna nóg boðið og gerði hann þrefalda skiptingu. Stuttu seinna átti Hilmar Árni góða aukaspyrnu beint á Baldur Sigurðsson sem skallaði í slánna og yfir. Stuttu seinna gerði KA sína þriðju breytingu en þá fór Elfar Árni af velli en hann virtist meiddur á nára og vonandi ekki alvarlegt en Elfar Árni var magnaður í leiknum í dag.

Síðustu mínútur leiksins pressaði Stjörnuliðið KA vel og var KA liðið í skotgröfunum og komu ótal fyrirgjafir og skot að marki en alltaf náði KA að bjarga. Varnarlína KA með Aron Dag fyrir aftan stóð allar árásir heimamanna af sér og þrjú stigin okkar og magnaður 0-2 sigur í höfn.

Í fyrsta skipti sem KA vinnur Stjörnuna í efstu deild í 28 ár og ótrúlega gaman að horfa á liðið sem barðist til síðasta blóðdropa þrátt fyrir öll meiðsla vandræðin í leiknum og varnarleikurinn var par excellence. Liðsheild KA var geggjuð í dag og spilaði liðið sem eitt og var alveg óhrætt að halda boltanum og nýtti sénsana sína sóknarlega vel gegn þéttu Stjörnuliði. 

KA-maður leiksins: Hallgrímur Jónasson (Besti leikur fyrirliðans fyrir KA frá því hann klæddist henni. Var magnaður og stýrði vörninni eins og góður kórstjóri. Vann ótal einvígi bæði í loftinu og á jörðinni. Einnig áttu Ýmir Már, Elfar Árni, Ólafur Aron og Alexander Groven tilkall til þess að verða menn leiksins en þeir voru frábærir í dag og sjaldan verið eins erfitt að velja mann leiksins.)

Næsti heimaleikur KA er laugardaginn næstkomandi þegar að við fáum ÍBV í heimsókn á Greifavöllinn. Hefst sá leikur kl.16:00 og vonumst við til að sjá sem flesta KA menn mæta tímanlega á leikinn norðanmegin og styðja við bakið á KA liðinu í baráttunni að þremur stigum. Áfram KA!


Knattspyrnufélag Akureyrar  |  Dalsbraut 1 600 Akureyri  |  S. 462 3482 | Hafa samband