Bikarslagur gegn Haukum á fimmtudag

Það er enginn smá leikur sem bíður KA liðinu í fyrstu umferð Coca-Cola bikarsins er liðið fær Hauka í heimsókn. Leikurinn fer fram á fimmtudag og hefst klukkan 18:00 og hvetjum við að sjálfsögðu alla til að mæta og styðja strákana til sigurs!

KA vann ótrúlegan stórsigur á Haukum í Olís deildinni fyrr í vetur fyrir framan stappað KA-Heimili og er ljóst að gestirnir hyggja á hefndir. Við þurfum svo sannarlega á ykkur að halda í stúkunni til að eiga möguleika í hið ógnarsterka lið gestanna.

Athugið að þar sem leikurinn er liður í bikarkeppninni þá gilda ársmiðar ekki á leikinn og hvetjum við ykkur því eindregið til að mæta snemma og tryggja ykkur miða á leikinn.

Hægt verður að kaupa Greifapizzur sem og Lemon samlokur á staðnum þannig að það ætti enginn að svelta í KA-Heimilinu þrátt fyrir að leikurinn sé á matmálstíma. Hlökkum til að sjá ykkur og áfram KA!