Tveir sigrar um helgina hjá KA-U

Strákarnir sigurreifir eftir helgina

Ungmennalið KA í handbolta lék sína fyrstu leiki á nýju ári þegar liðið hélt suður og lék gegn ungmennaliðum ÍR og Selfoss. Strákarnir eru í harðri toppbaráttu í 2. deildinni og ætla sér upp í Grill-66 deildina að ári og því ljóst að leikir helgarinnar væru gríðarlega mikilvægir.

Í gær, laugardag, mættu strákarnir liði ÍR en KA vann fyrri leik liðanna með 17 marka mun og klárt mál að Breiðhyltingar myndu vilja hefna fyrir þá flengingu. Strákarnir byrjuðu vel og náðu fljótt góðu taki á leiknum og leiddu 13-18 í hálfleik. Í síðari hálfleik var svo aldrei spurning hvar sigurinn myndi enda og KA vann öruggan 28-37 sigur.

Í lið KA vantaði þá Einar Loga Friðjónsson og Elfar Halldórsson en í staðinn léku þeir Dagur Gautason og Sigþór Gunnar Jónsson en Dagur er að stíga uppúr meiðslum. Innkoma þeirra tveggja var frábær en báðir gerðu þeir 8 mörk í leiknum. Þorri Starrason kom næstur með 6 mörk, Jóhann Einarsson og Heimir Pálsson gerðu 4, Einar Birgir Stefánsson 3 og þeir Jón Heiðar Sigurðsson og Bjarki Reyr Tryggvason gerðu 2 mörk hvor.

Í dag mættu strákarnir svo Selfyssingum en Selfoss hafði unnið fyrri leik liðanna í vetur í KA-Heimilinu og eru í toppbaráttunni. Hart var barist í fyrri hálfleiknum og ljóst að bæði lið ætluðu sér hin mikilvægu tvö stig sem í húfi voru. KA leiddi 14-16 í hléinu og kom svo af miklum krafti inn í þann síðari og náði að slíta sig frá heimamönnum. Á endanum vannst 24-34 stórsigur og strákarnir fögnuðu ákaft.

Jóhann Einarsson var markahæstur með 9 mörk, Einar Logi Friðjónsson og Einar Birgir Stefánsson gerðu 6 mörk, Heimir Pálsson og Sigþór Gunnar Jónsson gerðu 4, Dagur Gautason 3 og þeir Bjarki Reyr Tryggvason og Jón Heiðar Sigurðsson gerðu 1 mark hvor.

Svavar Ingi Sigmundsson og Magnús Orri Aðalsteinsson vörðu mark KA um helgina og stóðu sig vel að vanda.

Ungmennaliðið okkar er því á toppi deildarinnar eftir 8 sigra í 10 leikjum en lið Fjölnis á leiki til góða og getur náð toppsætinu. Næsti leikur hjá strákunum er enginn smá slagur því þeir taka á móti ungmennaliði Akureyrar í KA-Heimilinu 23. janúar næstkomandi þar sem allt er undir.