Enn einn stórleikurinn hjá KA/Þór framundan

Handbolti

Það er ekkert slegið slöku við í handboltanum um helgina, hér fyrir norðan er það KA/Þór sem er í sviðsljósinu. Á dagskrá eru þrír kvennaleikir og einn leikur hjá 3. flokki karla, í öllum leikjunum er andstæðingurinn ÍR.

Á laugardaginn hefst fjörið klukkan 11:45 með leik KA/Þór 2 og ÍR 2 en sá leikur er í 2. deild þriðja flokks kvenna og athugið að sá leikur fer fram í Íþróttahúsi Síðuskóla.

Klukkan 13:45 er stórleikur í Grill 66 deild kvenna þar sem KA/Þór tekur á móti ÍR. Þetta er toppbaráttuslagur þar sem ÍR situr í þriðja sæti deildarinnar með 16 stig eftir tólf leiki en KA/Þór með 21 stig eftir ellefu leiki. Þegar liðin mættust í fyrri umferðinni var um háspennuleik að ræða þar sem Sunna Guðrún tryggði KA/Þór eins marks sigur 29-30 með því að verja vítakast á lokasekúndu leiksins.
Við hvetjum alla sem mögulega geta til að koma og styðja stelpurnar, þær hafa svo sannarlega sýnt að þær eiga það skilið.

Klukkan 18:00 er komið að leik KA og ÍR í 3. flokki karla, 1. deild.

Þessari heimsókn ÍR-inga lýkur síðan á sunnudaginn en klukkan 15:00 mætast KA/Þór og ÍR í 1. deild 3. flokks kvenna.

Handboltaáhugamenn geta því fundið sér eitt og annað til að skemmta sér við um helgina.


Knattspyrnufélag Akureyrar  |  Dalsbraut 1 600 Akureyri  |  S. 462 3482 | Hafa samband