ÍBV afgreiddi KA/Þór í seinni hálfleik

Eyjavörnin lokaði vel á okkar lið (mynd: Hannes)

KA/Þór tók á móti ÍBV í 3. umferð Olís deildar kvenna í KA-Heimilinu í kvöld. Töluverð bjarstýni var fyrir leikinn enda höfðu stelpurnar unnið frábæran útisigur á Haukum í síðustu umferð á sama tíma og ÍBV hafði tapað gegn nýliðum HK á heimavelli.

Jafnt var á öllum tölum fyrsta kortérið en okkar lið leiddi leikinn mest allan tímann. Í stöðunni 7-8 fyrir ÍBV kom flottur kafli hjá stelpunum sem breytti stöðunni í 10-8 og aftur í 11-9. Útlitið gott og spilamennskan hafði verið flott. En þá kom erfiður kafli og gestirnir sneru leiknum, hálfleikstölur voru 14-17 og ÍBV komið með ágætistak á leiknum.

Í upphafi síðari hálfleiks tókst stelpunum að minnka muninn í tvö mörk í stöðunni 16-18 en þá datt botninn úr leik liðsins og sjö marka kafli gestanna gerði út um leikinn.

Staðan skyndilega orðin 16-25 og úrslitin í raun ráðin. Rétt eins og gegn Val í fyrsta leik mega stelpurnar þó eiga það að þær héldu áfram að reyna og misstu Eyjastúlkur ekki lengra frá sér en það er ljóst að leikmenn og þjálfarar þurfa að fara vel yfir hvað orsakar þessa slæmu kafla.

Lokatölur 26-34 og sigur ÍBV frekar sannfærandi. Okkar stelpur mega eiga það að þær geta svo sannarlega staðið í öllum liðum deildarinnar en það virðist vanta aðeins meira jafnvægi í spilamennskuna.

Þá gekk liðinu á köflum erfiðlega með að leysa 5-1 vörn ÍBV með Ester Óskarsdóttur lengst fyrir framan.

Mörk KA/Þór: Martha Hermannsdóttir 6, Katrín Vilhjálmsdóttir 5, Sólveig Lára Kristjánsdóttir 5, Þórunn Eva Sigurbjörnsdóttir 4, Ásdís Guðmundsdóttir 3, Hulda Bryndís Tryggvadóttir 1, Ólöf Marín Hlynsdóttir 1 og Rakel Sara Elvarsdóttir 1.
Í markinu varði Olgica Andrijasevic 9 skot og Selma Sigurðardóttir 3 skot.

Mörk ÍBV: Arna Sif Pálsdóttir 12, Greta Kavaliuskaite 8, Ester Óskarsdóttir 3, Karólína Bæhrenz Lárudóttir 3, Andrea Gunnlaugsdóttir 2, Kristrún Ósk Hlynsdóttir 2, Sandra Dís Sigurðardóttir 2, Linda Björk Brynjarsdóttir 1 og Sunna Jónsdóttir 1.
Guðný Jenný Ásmundsóttir varði 7 skot í marki ÍBV og sömuleiðis Andrea Gunnlaugsdóttir.