KA Íslandsmeistari í 4. flokki kvenna

Íslandsmeistarar 2018!

Í dag fór fram úrslitaleikur Íslandsmótsins í 4. flokki kvenna þegar KA tók á móti Breiðablik á Greifavellinum. Bæði lið unnu úrslitariðil sinn með fullu húsi stiga og ekki spurning að þarna mættust tvö bestu lið landsins. Mætingin á völlinn var til fyrirmyndar og var flott stemning yfir þessum stóra leik.

KA 2 - 1 Breiðablik
1-0 Tanía Sól Hjartardóttir ('2)
1-1 Birna Kristín Björnsdóttir ('49)
2-1 Rebekka Lind Aðalsteinsdóttir ('59)

KA fékk sannkallað draumabyrjun þegar Tanía Sól Hjartardóttir skoraði strax á 2. mínútu leiksins með skot í slá og inn eftir flotta fyrirgjöf sem Tanía tók niður og þrumaði að markinu.

Gestirnir úr Kópavoginum tóku í kjölfarið yfir leikinn og þjörmuðu að okkar liði þó án þess að ná að skapa sér of mikið af færum. KA liðið er þekkt fyrir ansi góðan varnarleik og það sýndi sig svo sannarlega í dag. Þrátt fyrir nokkrar ágætar tilraunir urðu mörkin ekki fleiri í þeim fyrri og KA leiddi því 1-0 í hálfleik.

Síðari hálfleikur hófst eins og sá fyrri, sóknarþungi Blikanna var orðinn ansi mikill og á 49. mínútu tókst þeim að skora eftir svakalega sókn þar sem KA vörnin varði í tvígang skot úr teignum. Boltinn endaði þó hjá Birnu Kristínu Björnsdóttur og hún renndi boltanum í netið og jafnaði metin.

Einhverjir höfðu kannski áhyggjur að nú myndu gestirnir bara halda áfram að stýra leiknum en annað kom sko á daginn. KA stelpurnar rifu sóknarleikinn í gang og áttu nokkrar góðar tilraunir.

Það var svo Rebekka Lind Aðalsteinsdóttir sem kom KA aftur yfir eftir frábæra sókn. Tanía náði boltanum við teiginn, renndi honum fyrir markið þar sem Sonja Kristín Sigurðardóttir lét boltann skemmtilega fara fram hjá sér og Rebekka hikaði hvergi og þrumaði boltanum í netið.

Það sem eftir lifði leiks reyndu bæði lið hvað þau gátu við að bæta við mörkum en fleiri urðu þau ekki og gríðarlega sætur 2-1 sigur KA staðreynd. KA er því Íslandsmeistari í 4. flokki kvenna í ár og eiga stelpurnar titilinn svo sannarlega skilinn. Spilamennska liðsins í sumar hefur verið algjörlega frábær og framtíðin í kvennaboltanum er svo sannarlega björt hjá félaginu.

Íslandsmeistarar KA 2018
Ísabella Júlía Óskarsdóttir, Jónína Maj Sigurðardóttir, Marey Dóróthea Maronsd. Olsen, Móheiður Ólafsdóttir, Tanía Sól Hjartardóttir, Sonja Kristín Sigurðardóttir, Iðunn Rán Gunnarsdóttir, Edda Líney Baldvinsdóttir, Heiðdís Birta Jónsdóttir, Ísfold Marý Sigtryggsdóttir, Rebekka Lind Aðalsteinsdóttir, Verónika Jana Ólafsdóttir, Ástrós Lena Ásgeirsdóttir, Lovísa Lea Jóhannsdóttir, Sara Mjöll Jóhannsdóttir, Auður Hákonardóttir, Sigrún Rósa Víðisdóttir og Hildur Lilja Jónsdóttir.

Þjálfarar liðsins eru þau Pétur Heiðar Kristjánsson og Ágústa Kristinsdóttir