Meistaradeildarævintýrið hefst á morgun

Fótbolti

Íslandsmeistarar Þórs/KA hefja leik í Meistaradeild Evrópu á morgun þegar liðið mætir Linfield Ladies. Stelpurnar leika í fjögurra liða riðli og aðeins sigurvegari riðilsins er öruggur um sæti í 32-liða úrslitum keppninnar en riðillinn fer fram í Norður-Írlandi á heimavelli Linfield. Leikurinn á morgun hefst klukkan 18:30.

Alls er keppt í 10 riðlum og aðeins tvö lið sem enda í 2. sæti fara áfram í næstu umferð. Það er því alveg ljóst að stelpurnar þurfa að stefna á sigur í riðlinum til að komast áfram í næstu umferð.

Ásamt Þór/KA og Linfield eru í riðlinum Wexford Youths Women frá Írlandi og Ajax frá Hollandi. Riðillinn klárast 13. ágúst með leik Þórs/KA og Ajax en fyrirfram er reiknað með að það gæti orðið úrslitaleikur riðilsins.

Þetta er í annað skiptið sem Þór/KA leikur í Meistaradeildinni en liðið varð Íslandsmeistari árið 2012 og lék því árið eftir í þessari mögnuðu keppni. Þar hófu stelpurnar leik í 32-liða úrslitum og mættu Rússneska liðinu Z. Krasnogorsk en Rússarnir unnu einvígið samanlagt 2-6.

Þá lék fyrirliði Þórs/KA hún Sandra María Jessen í Meistaradeildinni á nýliðinni leiktíð með Tékkneska stórliðinu Slavia Prag en Slavia féll út í 8-liða úrslitum gegn Wolfsburg sem fór alla leið í úrslitaleikinn. Það er því ágætis reynsla í okkar hóp fyrir slíkum stórleikjum.

Við munum að sjálfsögðu fylgjast vel með gangi mála og hlökkum mjög að sjá hvernig stelpunum gengur í þessari skemmtilegu keppni.


Knattspyrnufélag Akureyrar  |  Dalsbraut 1 600 Akureyri  |  S. 462 3482 | Hafa samband