Risaleikur í Grindavík í dag

Það er heldur betur mikið undir í Grindavík í dag þegar KA sækir Grindvíkinga heim í 19. umferð Pepsi Max deildar karla. Fyrir leikinn eru heimamenn í fallsæti með 18 stig en KA er sæti ofar með 21 stig. Það eru því heldur betur mikilvæg stig í boði fyrir bæði lið en aðeins þrír leikir eru eftir í deildinni að þessum leik loknum.

Sigur í dag kæmi KA liðinu í ansi góða stöðu hvað varðar það að halda sæti sínu í deild þeirra bestu enda yrði liðið þá sex stigum frá fallsæti og aðeins níu stig eftir í pottinum. Hinsvegar er ljóst að heimamenn munu selja sig ansi dýrt en í gegnum árin hefur KA ekki fengið mörg stig í Grindavík.

KA vann þó glæsilegan 1-2 sigur í fyrra eftir að Alexander Veigar Þórarinsson hafði komið heimamönnum yfir strax á 8. mínútu. Ásgeir Sigurgeirsson jafnaði metin áður en Ýmir Már Geirsson tryggði KA sigurinn með glæsilegu marki í uppbótartíma. Þetta var fyrsti sigur KA í Grindavík frá árinu 2007 og ljóst að strákarnir ætla sér að endurtaka leikinn í dag!

Við minnum á að ef þú kemst ekki á völlinn í Grindavík þá er leikurinn í beinni á Stöð 2 Sport og því um að gera að fylgjast vel með gangi mála í þessum mikilvæga leik, áfram KA!