Sigrar og töp hjá meistaraflokkunum okkar um helgina

Blak
Sigrar og töp hjá meistaraflokkunum okkar um helgina
Karlarnir sigruðu Stjörnuna í tvígang um helgina

Karlaliðið okkar vann Stjörnuna í tvígang

Stjarnan hóf fyrri leikinn af krafti og leiddu fram að miðri fyrstu hrinu. Þá komust KA menn í gang og sigu að lokum fram úr og unnu hrinuna 25-21. Önnur hrina var KA manna alveg frá upphafi og komust Stjörnumenn aldrei inn í hana. Lauk henni með 25-15 sigri KA. KA byrjuðu þriðju hrinuna af krafti en Stjörnunni tókst að minnka muninn um hana miðja. KA menn sigldu 25-21 sigri að lokum í höfn og 3-0 sigur því staðreynd.

KA hóf síðari leikinn af krafti og komust fljótt í gott forskot í fyrstu hrinu. Stjörnumenn náðu að minnka muninn örlítið en lauk hrinunni þó með 25-21 sigri KA. KA menn skoruðu 10 stig í röð í annarri hrinunni og leiddu 12-2 þegar Stjarnan skoraði loks stig. Hrinunni lauk með 25-11 sigri KA. Stjarnan spilaði betur í þriðju hrinunni og leiddu alveg fram að miðri hrinu. Þá skoruðu KA menn nokkur stig í röð og innsigluðu loks 3-0 sigur með 25-20 sigri í hrinunni.

Eftir leikinn er KA í öðru sæti, stigi á eftir HK en hafa spilað einum færri leik. Liðin mætast í tvígang í Fagralundi í Kópavogi um næstu helgi og hvetjum við sem flesta til að koma og styðja okkar menn.

Kvennnaliðið tapaði fyrir Þrótti Reykjavík

Konurnar okkar mættu Þrótti Reykjavík í tvígang um helgina og töpuðu þær báðum leikjunum, 1-3 og 2-3. Meiðsli og veikindi hrjáðu liðið í þessum tveimur leikjum þar sem María Díaz Perez var meidd í læri og Arnrún Eik Guðmundsdóttir lék ekki vegna höfuðhöggs sem hún varð fyrir í leik gegn Aftureldingu um síðustu helgi.

Fyrstu tvær hrinurnar reyndust erfiðar fyrir KA þar sem þeim gekk illa að taka á móti sterkum uppgjöfum Þróttara. Lauk hrinunum með 14-25 og 11-25 sigri Þróttar. KA sneru blaðinu algjörlega við í þriðju hrinu þar sem þær spiluðu mjög vel og unnu hana að lokum 25-13. KA leiddu fjórðu hrinuna þar til alveg undir lokin. Þær gerðu sig sekar um þrjú sóknarmistök í blálokin og töpuðu hrinunni 25-27 og leiknum því 1-3.

Fyrsta hrinan í síðari leiknum einkenndist af mörgum mistökum KA kvenna og lauk henni með 16-25 tapi. Önnur og þriðja hrinan voru töluvert betri þar sem þær unnu sér fljótt upp gott forskot og létu það aldrei af hendi. Lauk þeim með 25-20 og 25-12 sigrum KA. Botninn datt svo algjörlega úr spili KA í fjórðu og fimmtu hrinu sem lauk með 10-25 og 8-15 tapi og leiknum því 2-3.

KA, Þróttur Reykjavík og Völsungur eru jöfn í 5.-7. sæti deildarinnar með 5 stig eftir leikina en KA á þó leik til góða á Þrótt. Næsti leikur KA er miðvikudaginn 13. desember við Völsung á Húsavík og hvetjum við alla til að gera sér ferð þangað og styðja við bak kvennanna okkar.


Knattspyrnufélag Akureyrar  |  Dalsbraut 1 600 Akureyri  |  S. 462 3482 | Hafa samband