Stórleikur hjá Þór/KA á morgun

Íslandsmeistarar Þórs/KA taka á móti Stjörnunni á Þórsvelli á morgun, þriðjudag, klukkan 18:00. Þetta er þriðji toppslagurinn í röð hjá stelpunum en þær unnu Breiðablik 2-0 og gerðu 0-0 jafntefli við Val í síðustu leikjum. Fyrir leikinn er Þór/KA í 2. sæti deildarinnar með 20 stig en Breiðablik er á toppnum með 21 stig.

Stjarnan hikstaði í upphafi sumars en hefur náð að koma sér nær toppsætunum og er í dag með 16 stig í 4. sætinu. Það er ljóst að það er gríðarlega mikið undir hjá báðum liðum, Stjarnan verður einfaldlega að vinna ef að þær ætla að eiga einhverja möguleika á að halda í við toppinn og á sama tíma þurfa okkar stelpur að halda áfram að hala inn stigunum enda mun hvert stig skipta gríðarlega miklu máli þegar upp verður staðið í lok sumars.

Við hvetjum að sjálfsögðu alla sem geta til að mæta á Þórsvöll á morgun og styðja stelpurnar til sigurs. Eini tapleikur sumarsins kom einmitt á heimavelli gegn Stjörnunni í bikarnum og þurfum við öll að leggja okkar að mörkum til að kvitta fyrir þann leik, áfram Þór/KA!