Keppnistímabilið 1996-1997

Patrekur Jóhannesson hvarf á braut á vit ævintýranna í Þýskalandi, í stað hans kemur Hvít-Rússi að nafni Sergei Ziza auk þess sem Sævar Árnason gengur til liðs við KA úr Þór. Síðar um haustið kemur Jakob Jónsson inn í hópinn en mörg ár eru síðan Jakob lék síðast með KA.

Haukar vinna SS-Byggismótið, hitt Hafnarfjarðarliðið, FH, í öðru sæti en KA í því 4. KA vann hins vegar Val í leik „Meistarar meistaranna“ 24:23 og var sá titill í okkar höndum í fyrsta sinni. Deildin hefst með sigri á Haukum 29:28 í miklum baráttuleik og þótti gott veganesti í hinni hörðu baráttu á komandi mánuðum. Julian gerði 13 mörk og Ziza 7. Annars vöktu athygli deilur forráðamanna KA og Vals við stjórn HSÍ vegna sjónvarpsútsendinga, sem selst hafa til Ríkissjónvarpsins á lágu verði. Auk þess mun HSÍ skulda KA fúlgur fjár og eru menn eðlilega óhressir með framgönguna. Olli umræðan allnokkru fjaðrafoki, var KA því sem næst búið að semja við Stöð tvö þegar ákveðið var að standa með öðrum liðum deildarinnar að samningi við RÚV og mun HSÍ hafa gert upp skuld sína.

KA mætti Svissnesku bikarmeisturunum Amiticia í tveimur leikjum á Akureyri. Jafnt var í báðum leikjum, vann KA á að skora fleiri mörk á „útivelli“ en úrslit urðu 27:27 og 29:29. Lék KA ekki vel í leikjum þessum voru m.a. með 4 marka forystu í síðari leiknum er 2.30 mín. voru eftir af leik en máttu svo teljast heppnir með jafnteflið. Í leikjunum tveimur skoruðu mest, samtals, Julian 13, Ziza 12, Jóhann Gunnar 10.

KA tapaði með einu marki í Mosfellsbænum gegn Aftureldingu 28:29, í bráðfjörugum leik þar sem Ziza var okkar besti maður. KA vann hins vegar Íslandsmeistara Vals örugglega 27:23, Julian naut sín vel og gerði 9 mörk. Hafi Julian leikið vel gegn Val fór hann hamförum gegn Selfossi og gerði 14 mörk í sigurleik 34:26. KA dróst gegn Belgísku bikarmeisturunum Herstal og vann fyrri leikinn næsta létt 26:20, enn og aftur bar Julian höfuð og herðar yfir aðra og gerði 13 mörk! Í Belgíu lék liðið í meðallagi vel en engu að síður mátti Herstal þakka fyrir 23:23 jafntefli og KA áfram í 8-liða úrslit. Julian hélt áfram að hrella markverði Herstal og gerði 11 mörk, Jakob 5 og Ziza 3.

Um áramót er liðið í 3-ja sæti eftir Aftureldingu og Haukum, vel gengur í bikarnum 4. árið í röð. Nýtt ár hefst með sigrum á FH, 29:25, HK, 27:23, Gróttu 26:24, Aftureldingu 27:23 í deildinni, gegn KR, 25:21, og ÍR, 24:22, í bikarnum og liðið komið í úrslit 4. árið í röð! Slíkt afrek er harla óvenjulegt, kannski einsdæmi. Liðið hélt áfram að leika vel og vann hið geysisterka lið Fotex Vesprém 32:31 í vel fylltu KA-heimili. Leikurinn var stórgóð skemmtun, hraður og skemmtilegur handknattleikur þótt engum dyldist að slík forysta dygði skammt gegn svo sterku liði. Sigur vannst engu að síður og það eitt út af fyrir sig er vel gert. Julian setti mark sitt á leikinn með 14 mörkum, Björgvin Þór 5 og Ziza 4.

Duranona skorar gegn VesprémJulian Róbert Duranona skorar gegn Vesprém í KA-Heimilinu

Seinni leikurinn var okkar mönnum erfiður, lið Fotex Vesprém setti þegar í fluggírinn og KA sá aldrei til sólar, kannski vegna 2.500 áhorfenda, 12 marka tap var niðurstaðan í leik sem endaði 22:34. Óþarflega stórar tölur en breyta í sjálfu sér litlu. Julian með 10 mörk og Ziza 8.

Viku síðar var stóra stundin runnin upp, fjórði bikarúrslitaleikur KA á jafn mörgum árum, andstæðingur hið sterka lið Hauka. KA-liðið byrjaði mun betur og lengi vel leit út fyrir að nú yrði reynslan okkar mönnum dýrmætt nesti en svo virtist sem þreyta sæti í mönnum og Haukar nýttu sér það til fullnustu og unnu verðskuldað 24:26. Guðmundur Arnar var að verja vel fyrir KA, einkum í fyrri hálfleik, en maður vallarins var Bjarni Frostason markvörður Hauka, hann lokaði á KA-menn langtímum saman. Julian gerði 8 en hefur oftast leikið betur.

Almennt stóðu yngri flokkarnir sig vel á Íslandsmótinu og vannst það afrek að vinna hvoru tveggja 2. og 3. flokk á Íslandsmóti þetta árið.

Íslandsmeistarar KA 1997 – 2. flokkur karla
Íslandsmeistarar KA 1997 – 2. flokkur karla. Aftari röð frá vinstri: Páll Alfreðsson formaður handknattleiksdeildar, Alfreð Gíslason þjálfari, Anton Þórarinsson, Atli Þórarinsson, Níels Reynisson, Heiðmar Felixson, Jóhannes Jónsson, Heimir Örn Árnason, Kári Jónsson, Sigmundur Þórisson fomaður KA. Fremri röð frá vinstri: Árni Torfason, Halldór Jóhann Sigfússon, Hafþór Einarsson, Sverrir Björnsson fyrirliði, Hörður Flóki Ólafsson, Jónatan Magnússon, Þórir Sigmundsson, Jón Óskar Ísleifsson liðsstjóri.

Íslandsmeistarar KA 1997 – 3. flokkur karla
Íslandsmeistarar KA 1997 – 3. flokkur karla. Aftari röð frá vinstri: Jóhannes G. Bjarnason þjálfari, Anton Þórarinsson, Jónatan Magnússon, Jóhannes Jónsson, Kári Jónsson, Heimir Örn Árnason, Atli Þórarinsson, Tómas Jónasson, Jón Óskar Ísleifsson liðsstjóri. Á myndina vantar Hans Hreinsson. Fremri röð frá vinstri: Ísak Guðmann, Níels Reynisson, Jóhann Hermannsson, Þórir Sigmundsson fyrirliði, Hafþór Einarsson, Hilmar Stefánsson, Ingvar Stefánsson.

Íslandsmeistarar KA í 3. flokki A lið 1997
Íslandsmeistarar KA í 3. flokki í handbolta, A lið 1997. Aftari röð frá vinstri: Jóhannes Bjarnason þjálfari. Atli Þórarinsson, Þórir Sigmundsson fyrirliði, Hilmar Stefánsson, Heimir Árnason, Jóhannes Árnason, Hafþór Einarsson, Kári Jónsson, Hans Hreinsson. Fremri röð frá vinstri: Jóhann Hermannsson, Ingimar Stefánsson, Níels Reynisson, Jónatan Magnússon, Ísak Jónsson, Tómas Jónsson, Anton Þórarinsson.

Íslandsmeistarar KA í 5. flokki C lið 1997
Íslandsmeistarar KA í 5. flokki í handbolta, C lið 1997. Aftari röð frá vinstri: Jóhannes Bjarnason þjálfari, Halldór Tuliníus, Jóhann Valdemarsson, Kristján Aðalsteinsson, Elvar Alfreðsson, Friðrik Smárason, Þórir Sigmundsson, aðstoðarþjálfari. Fremri röð frá vinstri: Lárus Ásgeirsson, Þorgeir Finnsson, Daníel Christensen, Helgi Jónasson, Sigurður Fannar Stefánsson, Steindór Ragnarsson.

Akureyramótið var að mestu eign KA og hefur svo verið í allnokkur ár. Meistaraflokkurinn, sem var aðallega skipaður yngri leikmönnum, vann yfirburðasigur á Þór 33:18 en þar fór fremstur Sævar Árnason og gerði 8 mörk í öllum regnbogans litum.

Julian Róbert Duranona, Kúbverjinn orðinn íslenskur ríkisborgari og valinn í landslið Íslands þegar í stað! Björgvin Þór einnig í landsliði Þorbjarnar. Í deildinni gekk illa eftir nefnda ósigra, liðið var ekki að leika af sömu ánægjunni og fyrr í vetur, menn virðast ekki jafn hungraðir. Afturelding vinnur deildina, er deildarmeistari með 34 stig, Haukar 32 og KA 27.

Úrslitakeppnin
KA mætir Stjörnunni í 8-liða úrslitum. Leiksins í KA-heimilinu verður ekki minnst fyrir gæða handknattleik, fremur fyrir dauflega stemmningu og lítið skor, 14:17 tap í fyrsta leik og enn slen yfir leikmönnum.

Mikil spenna ríkti í Garðabænum fyrir 2. leikinn. Valdimar Grímsson, sá ódrepandi baráttujaxl var mættur með lið sitt gegn KA. Jafnt var með liðunum til að byrja með, þá kom fjörkippur KA-manna sem Stjarnan svaraði með öðrum uns KA-menn sögðu hingað og ekki lengra og gjörsigruðu lið Stjörnunnar 29:20. Julian sem hafði leikið afburða vel, var rekinn af velli þegar 15 mín. voru eftir af leik en leikmenn KA sýndu styrk og unnu verðskuldað örugglega. Oddaleikurinn var eign KA-manna sem unnu auðveldan sigur 22:17.

Ljóst var að framundan var erfið hindrun, bikarmeistarar Hauka, svo fór að þeir unnu fyrsta leik 24:25 á Strandgötunni í hörkuleik þar sem Ziza og Julian léku mjög vel, reyndar liðið í heild. Annar leikurinn var ekki síður spennandi, jafnt á öllum tölum, einnig í leikslok en KA hafði betur í framlengingu og vann með tveggja marka mun.

Úrslitaleikur liðanna var gríðarlega spennandi, sveiflukenndur og hraður. Haukar voru iðulega fyrri til að skora en KA var aldrei langt undan en þegar skammt er eftir af leik hafa Haukar svo til tryggt sér sigur, með fjögurra marka forystu. KA-liðið gefst ekki svo auðveldlega upp og með firna baráttu tekst liðinu að snúa leiknum sér í hag, Guðmundur Arnar sýnir meistaramarkvörslu, Julian og Ziza skora mörg glæsileg mörk. Hraðaupphlaupsmark Jóhanns Gunnars er stal knettinum nánast úr höndum Rúnars Sigtryggssonar seint í leiknum og sigurmark Julians verða lengi í minnum höfð. Julian með löngum armi sínum stöðvar sókn Haukanna stígur stórum skrefum fram völlinn og stekkur upp á punktalínu og þrumar knettinum í netið með ægiföstu skoti framhjá Bjarna Frostasyni markverði. Hvílík gleði er flautan gall í lokin - komnir í úrslit 3. árið í röð!

Fyrsti leikur Aftureldingar og KA var æsispennandi en heimamenn voru sterkari á endasprettinum og unnu 24:27. Julian með 6 mörk og Jakob 5. Annar leikur liðanna, leikinn á Akureyri, var einnig hörkuleikur en KA-menn héldu Aftureldingu frá sér lengst af og liðið vann 27:24. Julian átti stórleik og gerði 12 mörk, Jóhann Gunnar 7. Þriðji leikurinn hófst á stórskotahríð Aftureldingar sem virtist ætla að enda með því að senda KA-menn heim með tap á bakinu og 1:2 stöðu fyrir 3. leik. Um miðjan fyrri hálfleik fer KA-vélin af stað með Julian í fararbroddi og eftir að hafa náð forystu var aldrei horft um öxl og liðið vann verðskuldað 29:26 og óskastaða komin upp. Ziza, sem lék frábærlega, 9 mörk, Julian 7 og Jóhann Gunnar 5.

KA-heimilið var eðlilega troðfullt, stemmningin klukkutíma fyrir leik orðin sjóðandi heit, eitthvað stórkostlegt lá í loftinu. 4. leikur KA og Aftureldingar var mikill baráttuleikur. Niðurstaðan var KA-fólki einkar ánægjuleg, 24:22, og Íslandsmeistaratitillinn langþráði kominn í hús. Sigurdansinn sem stiginn var á gólfi KA-heimilisins var engum öðrum dansi líkur, hver dansaði í sínum takti en allir glöddust yfir því sama - að loksins, loksins hafði lið þeirra KA náð á hæstu hæðir og ljóst að veröldin yrði aldrei söm á ný.

Íslandsmeistarar KA í handknattleik 1977
Íslandsmeistarar KA í handknattleik 1997. Aftari röð frá vinstri: Ingibjörg Ragnarsdóttir, nuddari, Leó Örn Þorleifsson, Sverrir Björnsson, Guðmundur A. Jónsson, Erlingur Kristjánsson, Heiðmar Felixson, Þorvaldur Þorvaldsson, Julian Duranona, Sergei Zisa, Árni Stefánsson, liðsstjóri. Fremri röð frá vinstri: Halldór Sigfússon, Sævar Árnason, Björgvin Þ. Björgvinsson, Hörður Flóki Ólafsson, Jakob Jónsson, Hermann Karlsson, Jóhann G. Jóhannsson, Alfreð Gíslason.

Þætti Alfreðs Gíslasonar er lokið að sinni, hann heldur að nýju á vit ævintýranna í Þýskalandi, nánar tiltekið til Hameln. Leikmannsferli Alfreðs er lokið, hann dró þungt hlass á síðustu metrunum í vetur og uppskar laun erfiðis síns ásamt drengjunum sínum. Að öllum ólöstuðum var sigur Erlings fyrirliða stærstur, eftir öll þessi ár í eldlínunni vannst Íslandsmeistaratitillinn og það sem meira er, nú státar Erlingur af slíkum titlum í handknattleik jafnt sem knattspyrnu, rétt eins og litli bróðir, Jón Valsmaður. Erlingur ákvað að leggja skóna á hilluna og einbeita sér að þjálfun og fjölskyldu sinni, að ætla má. Erlingur er sú fyrirmynd sem hvert félag óskar sér, heill og sannur félagsmaður sem ávallt er reiðubúinn að vinna félagi sínu góðverk, slíkur maður er hverju félagi gulls ígildi.

Einkum tveir þættir skilja milli KA nútímans og fyrri ára. Með Alfreð kom nýtt viðhorf til íþróttarinnar, árangur var settur í forgang og sagt skilið við lífspeki fyrri ára þegar menn léku fremur ánægjunnar vegna. KA er komið í fremstu röð, andstæðingar taka fullt tillit til félagsins og vegna árangurs er nafn Akureyrar æ oftar í fréttum, ekki einungis á Fróni heldur á stundum á meginlandinu einnig. Við brotthvarf Alfreðs gefst tækifæri að líta yfir farinn veg og eins horfa til framtíðar. Framundan eru spennandi tímar þar sem ungviðið okkar mun halda merki félagsins á lofti og að hinn sanni félagsandi muni aldrei hverfa því hann er hornsteinn félagsstarfsins.

Hinn þátturinn er tilkoma KA-heimilisins. Félagsheimilið er hjarta félagsstarfsins og KA-heimilið hefur á þessum fáu árum orðið mótandi fyrir þá stemmningu sem þar skapast á leikjum handknattleiksliðs KA. Þessi ár hússins, frá upphafi, hefur Sigfús Karlsson keikur staðið á palli blaðastúku, haldið um hljóðnemann og átt sinn stóra þátt í að skapa andrúmsloft sem við njótum og aðrir líta á sem fyrirmynd. Íþróttin er skemmtileg, það spillir ekki að fá að njóta hennar í líflegri stemmningu og finna, að við sem á pöllunum sitjum skiptum máli og eigum þannig okkar þátt í að gera KA-heimilið að því sem það er, einstakt í sinni röð.

Leikmenn KA 1996-1997
Umfjöllun Morgunblaðsins 96-97
Myndbönd frá 1996-1997

1995-1996 << Framhald

Knattspyrnufélag Akureyrar  |  Dalsbraut 1 600 Akureyri  |  S. 462 3482  |  handbolti@ka.is