KR vann leikinn mikilvæga

Callum stóð fyrir sínu í dag (mynd: Þórir Tryggva)

Það var stórslagur á Greifavellinum í dag þegar KA tók á móti KR. Í vikunni varð ljóst að 4. sætið í deildinni mun gefa Evrópusæti en fyrir leik dagsins sátu KR-ingar í því sæti en KA aðeins tveimur stigum á eftir og gat því með sigri farið upp fyrir Vesturbæinga.

KA 0 - 1 KR
0-1 Kennie Chopart ('67)

Það var engin smá byrjun á leiknum því gestirnir tóku miðju, sendu boltann til baka þar sem Ásgeir Sigurgeirsson pressaði, náði boltanum og var skyndilega að sleppa í gegn. Hann þurfti á endanum að stoppa enda hundeltur af varnarmönnum KR þar sem hann kom sér í skotfæri en skot hans fór rétt framhjá.

Jafnræði var með liðunum í upphafi en ekki var mikið um opin færi. Í rauninni var fyrri hálfleikur allur stál í stál og ljóst að hvorugt liðið vildi tapa leiknum enda mikið undir. Það var því markalaust er liðin gengu til búningsherbergja og ósk allra í stúkunni að leikurinn myndi opnast í þeim síðari.

Það var því ansi svekkjandi hvernig síðari hálfleikur spilaðist en gestirnir tóku völdin og þjörmuðu að KA liðinu sem þurfti oft á tíðum að verjast með alla fyrir aftan miðju. Á 67. mínútu kom markið sem lá í loftinu en það gerði Kennie Chopart eftir laglegt samspil með Pálma Rafni.

Því miður gekk okkar liði ansi erfiðlega að finna taktinn og var ekki mikið sem benti til þess að KA myndi jafna metin enda fór svo að lokum að gestirnir kláruðu leikinn 0-1 og sigldu þremur stigum í hús. Spilamennska KA liðsins í dag olli vonbrigðum þó vissulega verði maður að virða það að töluverð meiðslavandræði eru að hrjá mannskapinn.

KR stekkur því 5 stigum á undan okkur í Evrópubaráttunni þegar 5 umferðir eru eftir og það þarf því ansi mikið að falla með okkur ef sá draumur á að rætast. Næsti leikur er útileikur næstu helgi gegn Víkingum sem eru 4 stigum á eftir okkur í deildinni.

Nivea KA-maður leiksins Callum Williams (Það reyndi mikið á varnarlínuna í dag og Callum stóð svo sannarlega fyrir sínu, spilamennskan hjá Callum í sumar er búin að vera til fyrirmyndar og frábært að sjá hve mikið hann hefur stigið upp í fjarveru Hallgríms og Guðmanns)