Svekkjandi tap eftir flotta frammistöðu

Fótbolti
Svekkjandi tap eftir flotta frammistöðu
Trninic gerði mark KA í leiknum (mynd: Þ.Tr.)

KA sótti Íslandsmeistara Vals heim í 8. umferð Pepsi deildar karla í gær. Bæði lið ætluðu sér sigurinn og úr varð hörkuleikur með áherslu á hörku enda voru alls 10 gul spjöld í leiknum, 5 á hvort lið og fengu báðir þjálfararnir að líta gula spjaldið.

Valur 3 - 1 KA
1-0 Kristinn Freyr Sigurðsson ('4)
1-1 Aleksandar Trninic ('34)
2-1 Guðjón Pétur Lýðsson ('45)
3-1 Ólafur Karl Finsen ('90)

Stuðningsmenn KA fjölmenntu á leikinn og var virkilega gaman að líta yfir stúkuna enda flestir mættir í gulum treyjum. Þá var stuðningurinn einnig til fyrirmyndar og var KA liðið allrækilega stutt frá upphafi leiks til lokaflautsins.

Heimamenn byrjuðu leikinn betur og þeir komu boltanum í netið strax á 4. mínútu leiksins þegar Guðjón Pétur Lýðsson náði boltanum fyrir utan teig okkar manna, renndi honum fyrir framan markið og þar var Kristinn Freyr Sigurðsson í dauðafæri og gat ekki annað gert en skorað.

Strax í kjölfarið var KA nálægt því að jafna metin þegar Bjarni Mark Antonsson átti hörkuskalla í slánna og út eftir hornspyrnu. KA liðið kom sér strax betur inn í leikinn og fyrr en varir hafði liðið náð að snúa leiknum sér ívil og virtist aðeins spurning hvenær en ekki hvort jöfnunarmarkið kæmi.

KA liðið pressaði heimamenn og voru alltaf líklegir í föstum leikatriðum, jöfnunarmarkið kom svo einmitt uppúr hornspyrnu sem Bjarni Mark tók og Aleksandar Trninic skallaði boltann af afli í netið. Staðan orðin 1-1 og KA liðið að spila flottan bolta.

Heimamenn gáfu aðeins í eftir markið en KA liðið var komið í gang og var áfram sterkari aðilinn. Það var því ansi mikið áfall þegar Guðjón Pétur Lýðsson skoraði ótrúlegt mark með þrumuskoti af um 35 metra færi uppúr engu. Skot hans var alveg útvið stöng og lítið hægt að gera við markinu.

Síðari hálfleikur var fjörugur en ekki eins opinn og sá fyrri, þegar leið á hálfleikinn fór KA liðið að pressa hærra og reyna allt hvað þeir gátu til að jafna metin. Valsarar gerðu hvað þeir gátu til að drepa tempóið í leiknum og lágu hvað eftir annað "meiddir" á vellinum. Það fór því ekki vel í KA menn þegar uppbótartíminn var sýndur en hann var 5 mínútur.

En uppbótartíminn kom ekki að sök því Ólafur Karl Finsen refsaði KA liðinu þegar menn voru farnir að verjast á fáum mönnum og Ólafur Karl skoraði eftir að hafa komist einn gegn Cristian Martinez í marki KA. Lokatölur 3-1 sem segja alls ekki sögu leiksins og mjög svekkjandi tap staðreynd.

Spilamennska KA liðsins var mjög flott í dag, þó vantar enn smá bit fram á við en það er engin ástæða til að örvænta og horfum við bara spenntir á næsta leik sem er heimaleikur gegn Stjörnunni á fimmtudaginn.

Nivea KA-maður leiksins Hallgrímur Mar Steingrímsson (Grímsi átti flottan leik, var stöðugt ógnandi og var varnarlínu Vals mikil vandræði. Maður leiksins annan leikinn í röð og mjög jákvæðar fréttir að hann sé farinn að sýna sitt rétta andlit.)


Knattspyrnufélag Akureyrar  |  Dalsbraut 1 600 Akureyri  |  S. 462 3482 | Hafa samband