Fréttir

Í dag tryggði mfl. karla í blaki sér bikarmeistaratitil í blaki. Okkar menn öttu kappi við Stjörnuna og báru sigur úr bítum 3 - 2 í úrslitaleiknum sem fram fór í Laugardagshöllinni fyrr í dag. Við óskum strákunum til hamingju með árangurinn! Stelpurnar spiluðu einnig til úrslita í dag við HK, en töpuðu leiknum 3-1. Móttaka bikarmeisturunum til heiðurs verður haldin kl 17:30 á morgun mánudag í KA - Heimilinu. Vonumst til að sjá sem flesta!

Bæði lið KA munu spila í úrslitum Bridgestonebikarskins á sunnudaginn. Fara leikirnir fram í Laugardalshöllinni. Stelpurnar munu spila við HK kl 14:00 en strákarnir strax á eftir kl 15:30. Mótherjar þeirra verða Stjörnumenn en þeir unnu HK í æsilegum undanúrslitaleik 3-2. Er ástæða til að hvetja alla KA-menn á höfuðborgarsvæðinu til að fjölmenna í Höllina. Það er ekki á hverjum degi sem svona tækifæri gefst og ef allt gengur að óskum gætu bæði lið staðið uppi sem meistarar.

Karlalið KA tryggði sér á föstudag deildarmeistaratitilinn í blaki með 3-0 sigri á Þrótti. Langt er síðan liðið vann þennan titil síðast, svo langt að menn muna hreinlega ekki hvort það var 1993 eða 1994. Sigurinn var kærkominn enda búið að bíða lengi eftir titli. Á laugardag tapaði KA svo fyrir Stjörnunni 1-3 en sá leikur skipti engu. Stelpurnar spila við topplið HK á sunnudag kl 14 og svo verða bæði liðin í eldlínunni um næstu helgi þegar undanúrslit og úrslit Bridgestonebikarsins fara fram í Laugardalshöll.

Kvennalið KA lék sinn næstsíðasta leik í deildarkeppninni á laugardag. Fylkir var í heimsókn og eftir snarpa viðureign vann KA 3-0. Hrinurnar fóru 25-14, 25-15 og 25-16. Leikurinn var afar mikilvægur því liðin tvö, ásamt HK og Þrótti Neskaupstað eru að berjast um fjögur efstu sætin í deildinni. KA komst úr fjórða sætinu upp í annað, er með jafn mörg stig og HK.

Tvö efstu lið MIKASA deildar karla, KA og HK, mættust í Kópavogi í dag. Með sigri hefði KA tryggt sér deildarmeistaratilinn og um leið sinn fyrsta titil í 18 ár. Mikil stemning var á leiknum en liðsmenn KA voru illa stemmdir og steinlágu 1-3. KA á tvo leiki eftir í deildinni og sigur í öðrum þeirra nægjir til að landa deildarmeistaratitlinum. Stelpurnar spiluðu einnig í dag og unnu þær Ými 3-2. Þær eiga eftir tvo heimaleiki, gegn HK og Fylki en þau lið eru efst í deildinni. Stöðuna í kvennadeildinni má sjá með því að lesa meira. Bæði lið eru nú komin í úrslitakeppni Íslandsmótsins og einnig eru þau í undanúrslitum bikarsins. Karlaliðið mun spila við Þrótt Reykjavík í þeirri keppni en stelpurnar spila við Fylki. Báðir leikirnir fara fram 13. mars í Laugardalshöllinni. Ef KA kemst í úrslitaleikina þá munu þeir verða spilaðir daginn eftir.

Karlalið KA var í eldlínunni um helgina þegar liðið tryggði sér sæti í undanúrslitum Bridgestonebikarsins. Sex lið börðust um tvö laus sæti en kvennalið KA var þegar búið að tryggja sitt sæti í undanúrslitunum. KA strákarnir rúlluðu yfir alla andstæðinga sína og verða því í Laugardalshöllinni 13. mars þegar undanúrslitin fara fram. Stelpurnar verða þar líka og er ástæða fyrir Eyfirðinga, Þingeyinga, Ólsara og fleiri að fjölmenna í Höllina.

KA tók á móti Þrótti Reykjavík í KA heimilinu á laugardag bæði í karla- og kvennaflokki.  Karlaliðið steig stórt skref í átt að deildarmeistaratitlinum með 3-1 sigri en liðið er nú efst í MIKASA deildinni þegar þrjár umferðir eru eftir. Kvennaliðið vann einnig sinn leik eftir mikinn barning og tryggði sig þar með inn í úrslitakeppnina.

Kvennalið KA tapaði 3-0 (25-19, 25-16, 25-19) fyrir Þrótti Neskaupstað um helgina. Þrátt fyrir öruggan sigur Þróttar stóðu KA stúlkur sig með ágætum lengst af og veittu Þrótti verðuga keppni.

Í dag vann karlalið KA góðan 3-0 sigur á áhugalitlum HK-ingum. KA menn áttu harma að hefna en HK er eina liðið sem hefur unnið KA á þessu keppnistímabili. Í þeim leik komust KA menn í 2-0 en glutruðu leiknum svo í einhverju mesta klúðri íþróttasögu Íslands. Nú var annað uppi á teningnum en HK komst nærri í lokahrinunni.

Á KA - deginum í dag, sem fram fór í tilefni 82. ára afmæli KA, var íþróttamaður KA kjörinn. Í ár var Piotr Slawomir Kempisty kjörinn. Piotr var valinn besti leikmaður 1. deildar karla 2009 af leikmönnum og þjálfurum deildarinnar er hann stigahæstur í MIKASA deild karla eftir fyrstu fimm umferðir þessa keppnistímabils. Í öðru sæti var Haukur Heiðar knattspyrnumaður og í því þriðja var Helga Hansdóttir júdókona en þau hafa bæði staðið sig virkilega vel á árinu. Heimasíðan óskar þessu frábæra keppnisfólki til hamingju með titlana!