Ágætur sigur hjá Þór/KA

Stelpurnar í Þór/KA unnu góðan sigur í gærkvöld á Fylkisstelpum, 3-1. Spilað var á Þórsvelli.

Þetta var fyrsti leikur Þórs/KA undir stjórn nýs þjálfara, Hlyns Eiríkssonar, og er óhætt að segja að hann hafi byrjað vel með liðið. Rakel Hönnudóttir skoraði fyrsta mark norðanstúlkna strax á 13. mínútu og bandaríska stúlkan Manya Janine Makoski bætti við öðru marki rétt áður en flautað var til hálfleiks.

Markamaskínan Anna Björk Björnsdóttir minnkaði muninn fyrir Fylki strax í upphafi síðari hálfleiks, en Þór/KA stúlkur héldu út og Arna Sif Ásgrímsdóttir innsiglaði öruggan sigur með þriðja markinu á 62. mínútu.

Eftir þennan sigur er Þór/KA í fjórða sæti deildarinnar með sex stig, þremur stigum á eftir toppliði ÍBV sem er með fullt hús stiga eftir þrjá leiki og markatöluna 12-0.