Elmar Dan genginn í raðir KA: Sætti mig aldrei við að tapa leikjum
Elmar Dan Sigþórsson gekk í dag í raðir KA-manna og verður löglegur með KA í leiknum mikilvæga á móti Leikni á Akureyrarvelli á morgun. Elmar Dan hefur undanfarin tvö ár búið í Noregi og spilað með tveimur þarlendum liðum, síðast með 2. deildar liðinu Förde. Elmar Dan hefur nú flutt heim til Akureyrar með fjölskyldunni og er albúinn að taka þátt í slagnum sem framundan er með KA.
Elmar Dan er gulur og blár í gegn. Hann æfði og spilaði með KA upp alla yngri flokkana og spilaði sína fyrstu leiki með meistaraflokki KA árið 2001 og spilaði með félaginu til 2004 þegar hann gekk í raðir Víkinga R og spilaði með þeim keppnistímabilið 2005. Spilaði síðan með Fjarðabyggð árið 2006. Elmar Dan gekk síðan aftur í raðir KA árið 2007 og lék með liðinu það ár og árið 2008. Fór síðan til Noregs árið 2009 og hefur sem fyrr segir spilað þar með tveimur liðum á undanförnum tveimur árum.
„Ég er mjög ánægður með að vera kominn heim til þess að taka þátt í slagnum með KA. Ég átti við meiðsl að stríða í vor, en er nú farinn að æfa á fullu á ný og er mjög spenntur að byrja aftur að spila á Akureyrarvelli. Ég hvet alla stuðningsmenn KA til að fjölmenna á völlinn á morgun og styðja við bakið á liðinu og ég trúi því og treysti að leikmenn liðsins leggi sig alla fram til þess að tryggja sigur á Leikni á morgun. Ég vonast til að geta fært liðinu eitthvert nýtt blóð og aukinn kraft og komið með smá reynslu og sigurvilja inn á völlinn. Það er ekkert launungarmál að ég sætti mig aldrei við að tapa leikjum. Það eru margir harðir KA-menn á Akureyri, en ætli það sé nokkuð ofmælt að ég sé í hópi þeirra allra hörðustu,“ segir Elmar Dan Sigþórsson, sem í það heila á að baki 99 meistaraflokksleiki með KA. Komi hann við sögu í leiknum við Leikni verður hann því sá 100. hjá Elmari Dan fyrir KA.