Fannar Hafsteinsson til reynslu hjá Watford og Tottenham

Fannar Hafsteinsson, hinn stórefnilegi 16 ára  markvörður K.A. fer eftir helgi til fyrstu deildarliðsins Watford  og úrvalsdeildarfélagsins Tottenham til reynslu.  Hann mun dvelja í Englandi næstu 12 daga.

Fannar hefur um nokkurt skeið verið undir smásjá enskra liða,  en það var  í kjölfar heimsóknar Knattspyrnuskóla Arsenal til Akureyrar fyrr í sumar sem hjólin tóku að snúast.

Fannar mun æfa með báðum liðunum og spila leiki með þeim.  Meðal annars mun hann spila leik með Watford gegn Arsenal um í næstu viku.  Vitað er að Arsenal og jafnvel fleiri ensk úrvalsdeildarlið munu fylgjast grannt með honum í þessum leik.

Yngri lið Watford hafa á liðnum árum skipað sér sess meðal þeirra bestu á Englandi.  Þykir uppbygging knattspyrnuakademíu þeirra á margan hátt til fyrirmyndar.  Sama má segja um starfið hjá Tottenham.

Fannar hefur æft fótbolta með K.A. frá sex ára aldri og notið reynslu og leiðsagnar Sandor Matus markvarðar mfl. K.A. ásamt handleiðslu þjálfarateymis yngri flokka félagsins. Fannar er á eldri ári í þriðja flokki KA og hann hefur einnig komið við sögu í 2. flokki KA og sömuleiðis verið varamarkvörður í meistaraflokki félagsins.