Hallgrímur Mar bestur og Mikael Breki efnilegastur
Lokahóf knattspyrnudeildar KA fór fram um helgina en KA lauk sumrinu með 5-1 heimasigri á ÍBV. Það dugði þó ekki og niðurstaða sumarsins er fall úr Bestudeildinni, þar með lýkur lengstu samfleyttu veru karlaliðs frá Akureyri í efstu deild fótboltans.
Niðurstaða sumarsins er vissulega mikil vonbrigði en þrátt fyrir erfitt sumar á vellinum var stuðningur KA fólks algjörlega til fyrirmyndar frá upphafi og til enda og ómetanlegt að finna fyrir kraftinum í félaginu. Það er klárt mál að við munum læra af sumrinu og komum sterk til baka.
Hallgrímur Mar Steingrímsson var kjörinn besti leikmaður KA í sumar en eins og svo oft áður stóð Grímsi fyrir sínu en hann heldur áfram að skrifa sögu félagsins sem leikja- og markahæsti leikmaður KA frá upphafi.
Mikael Breki Þórðarson var valinn efnilegasti leikmaður KA en Mikki sem er aðeins 19 ára gamall lék stórt hlutverk í liði KA í sumar og skoraði meðal annars tvö mörk. Mikki spilaði sína fyrstu keppnisleiki fyrir meistaraflokk sumarið 2022 og á heldur betur framtíðina fyrir sér.
Hallgrímur Mar náði þeim merka áfanga að leika sinn 400. keppnisleik fyrir KA í sumar en þar eru einungis taldir leikir í deild, bikarkeppni KSÍ, meistarakeppni KSÍ og evrópuleikir. Hallgrímur er leikjahæsti leikmaður í sögu KA en hann hefur nú leikið 404 leiki fyrir félagið, þar af eru 233 í efstu deild sem er einnig félagsmet.
Jakob Snær Árnason lék sinn 100. keppnisleik fyrir KA í sumar en í heildina eru leikirnir nú orðnir 120 talsins. Hann hefur gert í þeim 21 mark en þar af komu sex mörk í sumar.
Hallgrímur Mar var að lokum heiðraður fyrir að vera markahæsti leikmaður KA í sumar en hann gerði alls 14 mörk, þar af 13 í deild og eitt í bikarnum. Grímsi er einnig markahæsti leikmaðurinn í sögu KA en hann hefur gert 139 mörk fyrir félagið, þar af eru 88 í efstu deild sem er einnig félagsmet.