Hvar er hann nú: Örn Kató Hauksson

05.06.2011
Kató í leik með KA
Kató í leik með KA
Þá er komið að næsta manni á dagskrá í "Hvar er hann nú?" og það er hinn ávallt góði Örn Kató Hauksson sem er uppalinn hjá KA en yfirgaf liðið árið 2005 og spilaði eftir það með Val, Fram, Fjarðabyggð og Aftureldingu en hann spilaði þó ekki mikið vegna mikilla meiðsla. Hann snéri í millitíðinni heim á láni frá Val og var í byrjunarliði gegn Þór í bikarnum 11. júní 2007. Hann fór útaf illa handleggsbrotinn eftir 9 mínútur. Kató, eins og hann var ávallt kallaður og er líklega enn, var virkilega efnilegur á sínum tíma en svo illa hittist oftast á að þegar hann var kallaður í landslið var hann meiddur, óheppnari verða leikmenn varla. Kató leikur í dag bæði hand- og fótbolta í Noregi.

Hvenær spilaðir þú með KA? Síðasta tímabilið mitt með KA var 2005, plús þessar 10 mín sem ég spilaði árið 2007.


Hvar í heiminum býrðu í dag? Osló


Og hvað gerirðu af þér? Starfa hjá rafverktakafyrirtæki og er að spila með liði í 2. deildinni sem heitir Nesodden.


Menntun? Rafvirkjun og lýsingarhönnun.


Sambúð/Börn? Solo


Leikir fyrir KA? 55 og 1 mark


Þú varst á sínum tíma mjög efnilegur en meiðsli settu stórt strik í reikninginn, einhver eftirsjá? 


Meiðsli er bara partur af fótboltanum og er bara eitt af því sem þarf að læra ef maður ætlar að vera í þessu á annað borð.  Ég get alveg viðurkennt að ég hugsaði mikið um að hætta á tímabili en Toddi pískaði mig áfram og tók það ekki í mál að ég myndi gefast upp. Ég hef kannski verið aðeins óheppnari en aðrir en ég get ekki sagt að það sé nein eftirsjá. Ég er allavega heill í dag og ætla að spila áfram meðan ég hef gaman af.


Þú komst til KA á láni á miðju tímabili 2007 og handleggsbrotnaðir illa eftir u.þ.b 10 mínútur í fyrsta leik og það á móti Þór, það hljóta að hafa verið vonbrigði?

Já, það voru að sjálfsögðu gríðarleg vonbrigði. Held að það hafi verið ca. 7 mín búnar af leiknum þegar þetta gerðist. Ég fann um leið að það væri eitthvað alvarlegt að hendinni, þrjóskaðist engu að síður í nokkrar mínutur þar sem ég hreinlega neitaði að trúa þessu. 


Var það rétt ákvörðun á sínum tíma að yfirgefa KA? 

Þegar maður hugsar til baka þá held ég að það hafi verið rétt. Vantaði nýja áskorun og vildi breyta til.


Hvert er minnistæðasta tímabilið með KA og af hverju? Ætli það sé ekki tímabilið eftir að við fórum upp úr 1. deildinni. Okkur gekk vel bæði í deildinni og bíkarnum. Við vorum með góða blöndu af ungum og reyndari leikmönnum. Mikið af skemmtilegum karakterum!


Góð saga frá KA-tímanum? 

Það eru margar góðar minningar en sögurnar kannski ekki viðeigandi. En þar sem verið er að rifja upp

þegar ég handleggsbrotnaði þá er það mér ofarlega í huga þegar ég hleyp út að hliðarlínu og kalla á Stebba sjúkraþjálfara. Spyr hann hvort hann sé sammála mér um það að ég sé brotinn. Hann er mér sammála eftir að hafa kíkt á hendina og býðst til þess að teipa þetta.

Eftir að hafa hugsað mig tvisvar um (þar sem Stebbi er náttúrlega Evrópumeistari í teipingum og mjög góður sjúkraþjálfari) ákvað ég að það væri ekki ráðlegt og fór í staðinn upp á sjúkrahús og í aðgerð á hendinni. Sé ennþá eftir því að hafa ekki látið hann teipa þetta, bara aumingjaskapur í mér!! 


Áfram Steini mágur! áfram KA!


Til baka