KA tekur á móti Fjarðabyggð á fimmtudaginn

KA tekur á móti Fjarðabyggð í 9. umferð Inkasso deildarinnar á Akureyrarvelli á morgun (fimmtudag). Leikurinn hefst klukkan 19:15 og má búast við erfiðum leik. KA er á toppi deildarinnar með 19 stig ásamt nágrönnum okkar í Þór á meðan Fjarðabyggð situr í 10. sætinu með 7 stig.

Þrátt fyrir fá stig eru austfirðingarnir búnir að sýna góða spilamennsku í sumar og eru óheppnir með að hafa ekki náð í fleiri stig. Í síðustu umferð gerðu þeir 2-2 jafntefli við Grindavík eftir að hafa leitt 2-0 en Grindavík jafnaði í uppbótartíma. Í umferðinni á undan voru þeir að vinna Þór 2-1 en Þórsarar gerðu tvö mörk á lokaandartökum leiksins og unnu 2-3.

Það er því ljóst að okkar menn þurfa að mæta tilbúnir í slaginn ef menn ætla að halda toppsætinu. Fyrir leikinn eru 5 stig í liðið í 3. sæti og er mikilvægt að halda fjarlægð við liðin sem elta. Stuðningurinn við liðið skiptir sköpum og viljum við sjá ykkur sem flest í stúkunni, áfram KA!

Ef þið komist ekki á leikinn þá verður hann sýndur á KA-TV, það er því engin afsökun fyrir því að fylgjast ekki með!