Blaklið KA á NEVZA um helgina

Karla- og kvennalið KA í blaki eru á leiðinni út þar sem þau munu bæði keppa á NEVZA Club Championship evrópukeppninni. Leikið er í tveimur riðlum og fara efstu tvö liðin upp í undanúrslit og verður ákaflega gaman að sjá hvar okkar lið standa gegn jafn sterkum erlendum andstæðingum.

Karlamegin leikur KA í B-riðli ásamt BK Marienlyst og IBB Polonia. Fyrsti leikur er á föstudaginn klukkan 13:45 að íslenskum tíma gegn Marienlyst og svo á laugardaginn leika strákarnir gegn Polonia klukkan 11:15. Leikið er í Ishøj í Danmörku.

Hjá konunum er KA í A-riðli ásamt Brøndby VK og Oslo Volley en konurnar leika í Ängelholm í Svíþjóð. Á föstudaginn klukkan 13:45 að íslenskum tíma leika stelpurnar gegn Brøndby og svo gegn Oslo á laugardeginum klukkan 11:15. Liðin okkar leika því á nákvæmlega sama tíma í riðlakeppninni.

Undanúrslitin eru leikin seinni partinn á laugardeginum og svo er leikið um sæti á sunnudeginum. Við munum fylgjast grannt með gangi mála hér á síðunni og svo er ansi líklegt að boðið verði upp á beinar útsendingar frá mótinu.