Aldís Ásta snýr aftur heim!
Aldís Ásta Heimisdóttir snýr aftur heim og gengur í raðir KA/Þórs en undanfarin ár hefur hún farið hamförum með liði Skara HF í Svíþjóð þar sem hún var lykilmaður en með liði Skara varð Aldís bæði Svíþjóðarmeistari sem og deildarmeistari.
Aldís Ásta sem er 26 ára gömul er uppalin hjá KA/Þór og hóf ansi ung að leika með meistaraflokk félagsins en fyrstu leikirnir komu veturinn 2014-2015. Aldís lék alls 170 keppnisleiki fyrir KA/Þór fyrir för hennar til Svíþjóðar en hún gekk í raðir Skara haustið 2022.
Með KA/Þór sýndi Aldís Ásta að hún er ein besta handknattleikskona landsins og fór fyrir liði KA/Þór sem hampaði öllum titlum sem í boði eru er liðið varð Íslands-, Bikar- og Deildarmeistari auk þess að verða Meistari Meistaranna. Aldís skoraði meðal annars sigurmarkið í báðum úrslitaleikjum KA/Þórs gegn Val í baráttunni um Íslandsmeistaratitilinn.
Þá hefur hún leikið nokkra landsleiki fyrir A-landslið Íslands auk fjölda leikja fyrir yngrilandsliðin en Aldís lék meðal annars á HM í Ungverjalandi með U20 ára landsliðinu.
Aldís á von á sínu fyrsta barni í vor en hún er staðráðin í að koma sterk til baka á völlinn og ljóst að það verður gríðarlega sterkt að fá hana aftur heim. Við bjóðum Aldísi hjartanlega velkomna aftur í KA/Þór og hlökkum svo sannarlega til að sjá hana aftur í svarta búningnum.