02.03.2008

Ekki besti dagur strákanna en sigur samt

 A-lið 4. flokks mættu Aftureldingu á laugardag. Strax frá byrjum sást að strákarnir voru ekki nógu vel stemmdir í þennan leik og var leikurinn jafn allan tímann. Eftir jafnan leik náði KA að knýja fram sigur, 25-22, eftir að hafa hreinlega átt slakan dag.


Í fyrri hálfleik sást strax að okkar menn voru ekki alveg tilbúnir í þennan leik. Þeir lenda 1-5 undir eftir afleita byrjun, sérstaklega í vörn, þegar fimm mínútur voru búnar af leiknum. Eftir það þéttist varnarleikurinn og bætist og strákarnir komast inn í leikinn þrátt fyrir að sóknin hafi verið afleit allan fyrri hálfleikinn. KA jafnar í 6-6 en kemst ekki yfir fyrr en með seinasta marki fyrri hálfleik en staðan var 11-10 í hálfleik.

Í seinni hálfleik var leikurinn alltaf í járnum en leikur liðsins batnaði lítið. KA kemst 16-14 yfir og náði mest þriggja marka forystu í leiknum en lokatölur urðu 25-22 sigur KA.

KA strákarnir virkuðu hreinlega andlausir í dag. Mosfellingar mættu tilbúnir að spila og stemmning einkenndi þá enda léku þeir vel í leiknum. Okkar menn voru hreinlega ljónheppnir að ná stigum úr leiknum en lengi vel var eins og sumir leikmenn væru í skotkeppni og væru ekkert að gera til að hjálpa liðinu. Strákarnir voru á hálfum krafti og stemmningslausir en þá getur maður hreinlega aldrei leikið vel.

Aron Eyþórsson og Gunnar Bjarki markmaður voru einu leikmenn KA liðsins sem spiluðu að eðlilegri getu. Aron átti frábæra innkomu og nýtti færi sín afar vel en Gunnar hélt liðinu á floti lengi vel. Aðrir leikmenn virkuðu ýmist í skotkeppni eða hreinlega ekki tilbúnir í leikinn. Ljóst er að ef liðið ætlar sér eitthvað gegn FH um næstu helgi verður margt að breytast en liðið var langt frá sínu besta í dag.
Til baka