KA-HK: 0-3 í skemmtilegum leik

KA mætti með allt sitt lið í leikinn fyrir utan Unu. Hún var að spranga um á hælaháum skóm en okkar gamla góða Natalia hljóp í skarðið og spilaði upp í leiknum. Leikurinn byrjaði mjög vel fyrir KA en smám saman seig HK framúr. KA tók góðan kipp þegar leið á hrinuna og minnkaði muninn niður í 16-18. Þá hrökk allt í baklás og slök móttaka KA skilaði HK öruggu forskoti á ný. Endaði hrinan 18-25. Önnur hrinan var nokkuð svipuð þeirri fyrstu nema hvað KA náði aldrei að ógna HK að nokkru marki. Endaði hún 16-25. Í lokahrinunni prófaði Marek nýja uppstillingu en HK stelpurnar gáfu ekki færi á sér og tóku hrinuna nokkuð létt 12-25.

HK stelpurnar spiluðu mjög vel í leiknum og stíluðu á að sækja á alla helstu veikleikana í liði KA. Móttakan í heildina var slök og þar með var sóknarleikurinn erfiður. Aðeins þrír leikmenn KA skoruðu stig í leiknum og því miður vantaði framlag frá fleirum. Sóknin varð einhæf og fyrirsjáanleg og því erfitt að berja í gegnum vörn HK. Varnarleikurinn var hins vegar mjög flottur og fór Birna þar hamförum og bjargaði hverjum boltanum á fætur öðrum. HIð unga KA-lið má vera nokkuð ánægt með uppskeruna í vetur. Bronsverðlaun í deildinni, silfur í bikarnum og fjórða sætið í úrslitakeppninni. Takk fyrir veturinn stelpur.