Fjögurra stiga leikur í Kórnum hjá KA/Þór

Stelpurnar eru klárar í slaginn!

KA/Þór sækir HK heim í Olís deild kvenna í dag klukkan 16:00 í ansi mikilvægum leik. Fyrir leikinn eru stelpurnar í 4. sæti deildarinnar með 10 stig en HK er sæti neðar með 8 stig. Það má því með sanni segja að um fjögurra stiga leik sé að ræða og geta stelpurnar með sigri komið sér fjórum stigum frá HK.

Leikurinn er liður í 10. umferð deildarinnar og er næst síðasti leikurinn fyrir jólafrí. Ekki nóg með að sigur í leik dagsins kemur liðinu í ansi góða stöðu í baráttunni um 4. sætið þá mun aðeins muna einu stigi á KA/Þór og Stjörnunni sem er í 3. sætinu.

Við hvetjum að sjálfsögðu alla sem geta til að mæta í Kórinn og styðja stelpurnar til sigurs en fyrir þá sem ekki komast á leikinn verður hann í beinni útsendingu á Stöð 2 Sport, áfram KA/Þór!