Strákarnir í 3. flokki með flottan sigur

Sigurgleðin var ansi mikil í leikslok!

Strákarnir í A-liði 3. flokks karla í handboltanum unnu í gær sinn fyrsta leik í vetur en þeir keppa í efstu deild. Mikill stígandi hefur verið í leik liðsins í vetur og í gær kom fyrsti sigurinn og það gegn öflugu liði ÍR en fyrir leikinn voru þeir með 1 stig eftir jafntefli gegn Þór fyrr í vetur.

Leikurinn í gær var hörkuspennandi og léku bæði lið öflugan og hraðan sóknarleik en KA leiddi 15-14 í hálfleik. Síðari hálfleikur spilaðist mjög svipað og sá fyrri og mátti vart sjá hvoru megin sigurinn myndi enda. En strákarnir sýndu flottan karakter í að halda haus og sigla inn 30-29 sigri.

Arnór Ísak Haddsson var markahæstur með 13 mörk, Ragnar Sigurbjörnsson og Haraldur Bolli Heimisson gerðu báðir 4 mörk, Jón Ellert Magnússon og Ísak Ernir Ingólfsson gerðu báðir 3 mörk, Freyr Jónsson gerði 2 og Fannar Már Jónsson gerði 1 mark.

Með sigrinum jöfnuðu strákarnir lið Þórs í deildinni en næsti leikur er einmitt gegn Þórsurum á fimmtudaginn í KA-Heimilinu klukkan 19:50 og hvetjum við ykkur eindregið til að mæta á leikinn og styðja strákana til sigurs í bæjarslagnum.