Darren Lough áfram í herbúðum KA
Darren Lough er 23ja ára gamall og kemur frá Newcastle. Hann hefur spilað með unglingaliðum og varaliði úrvalsdeildarliðsins Newcastle og einnig kom hann við sögu í æfingaleikjum aðalliðsins. Síðastliðinn vetur spilaði hann með utandeildarliðinu Ashington og hann tók upp þráðinn með því liði eftir að hann fór aftur til Englands eftir að keppnistímabilinu í fyrstu deildinni hér á landi lauk. Með Ashington spilar Darren fram yfir áramót, en þá kemur hann aftur til Akureyrar til þess taka þátt í undirbúningi KA-liðsins fyrir átökin næsta sumar.
Darren spilaði 24 leiki með KA sl. sumar, 21 í 1.deildinni og 3 í Borgunarbikarnum og skoraði í þeim 1 mark - sigurmarkið gegn Þór á Akureyrarvelli. Hann er fjölhæfur varnarmaður - fyrst og fremst er hann vinstri bakvörður en einnig sýndi hann sl. sumar að hann getur auðveldlega leyst vel stöður miðvarðar og hægri bakvarðar. Í heimaleik KA gegn Þór hóf Darren til dæmis leik í stöðu vinstri bakvarðar, en færði sig yfir í miðvörðinn þegar Gunnar Valur Gunnarsson þurfti að yfirgefa völlinn vegna meiðsla. Fotbolti.net valdi Darren eimitt leikmann umferðarinnar í 1. deildinni eftir Þórsleikinn og hann var einn af þeim vinstri bakvörðum í deildinni sem var af sömu vefsíðu tilnefndur í úrvalslið fyrstu deildar eftir keppnistímabilið.
"Ég ákvað að gera nýjan samning við KA einfaldlega vegna þess að mér líkar mjög vel hjá félaginu og allir sem vinna í og kringum það er frábært fólk. KA hefur í sínum röðum góða leikmenn og hefur alla burði til þess að ná lengra en sl. sumar þegar félagið endaði í fjórða sæti á lakari markatölu en liðið í þriðja sæti. Mér finnst allir í KA stefna að sama marki og ég vil áfram leggja mitt af mörkum í þágu félagsins. Ég er mjög ánægður með að hafa endurnýjað samning minn við KA," segir Darren Lough.