Darren Lough til liðs við KA

KA hefur samið við enska vinstri bakvörðinn Darren Lough, sem er 23ja ára gamall og spilaði með unglingaliðum og varaliði úrvalsdeildarliðsins Newcastle. Hann kom einnig við sögu í æfingaleikjum aðalliðsins. Í vetur hefur hann spilað með utandeildarliðinu Ashington. Darren er nú þegar kominn með keppnisleyfi með KA og því löglegur í fyrsta leik KA-liðsins í 1. deildinni nk. laugardag gegn ÍR-ingum.

Darren kom til Akureyrar sl. þriðjudag og hefur æft tvívegis með KA-liðinu. Gengið var frá samningi við hann í morgun.

"Ég hef aldrei spilað utan Englands. Mér fannst tímabært að víkka út sjóndeildarhringinn og þegar sá möguleiki kom upp á borðið að koma til Akureyrar ákvað ég að slá til. Mér líst vel á KA, liðið hefur innanborðs góða leikmenn sem eiga að geta látið til sín taka. Ég hlakka mjög til þess að taka þátt í baráttunni með liðinu," sagði Lough að lokinni undirskrift samnings í morgun.