Grillveisla yngri flokka KA fyrir Þróttaraleikinn.

Á morgun, fimmtudaginn 11. ágúst, á meistaraflokkur KA heimaleik gegn Þrótti Reykjavík klukkan 19 á okkar iðagræna Akureyrarvelli. Þessi leikur er mjög mikilvægur fyrir okkar menn sem hafa hægt og sígandi verið að bæta fleiri stigum í sarpinn. Það er því afskaplega mikilvægt að allir KA-menn, stórir sem smáir, mæti á völlinn og hvetji strákana okkar til dáða.

Fyrir leik verður dr. Petar ásamt aðstoðarmönnum við grillið frá kl. 18 og býður upp á grillaðar pylsur í góðviðrinu sem Veðurstofan lofar. Ekki nóg með að boðið sé upp á pylsur heldur verða sundboltar gefnir á meðan birgðir endast.
Allir iðkendur yngri flokka KA eru hvattir til að drífa sig á völlinn kl. 18, klæddir helst í gult eða blátt, fá pylsu hjá doktornum og hvetja meistaflokk hátt og skýrt ÁFRAM KA, ÁFRAM KA!

Krakkar, takið mömmu og pabba með, líka afa og ömmu og alla sem þið þekkið. Það er lang skemmtilegast þegar margir eru að horfa og hvetja.