Gunnar Níelsson: KA-fjölskyldan er virkilega mögnuð

Loksins, loksins,  fyrsti heimaleikur okkar fer fram í kvöld.  Ég hef beðið þessarar stundar frá lokum október en nú er sú bið á enda. Lið okkar er klárt í slaginn, góður sigur um síðustu helgi eftir áfallið gegn ÍR helgina á undan staðfestir þessi orð mín.  

Undanfarnar vikur hafa verið viðburðaríkar og í mörg horn að líta hjá stjórn,  svo sem sala auglýsingaskilta, ársmiða og allt annað sem gera þarf í upphafi móts.
 
Ég er fyrir hönd stjórnar mjög þakklátur afar góðum undirtektum sem við höfum fengið. Ársmiðasala hefur verið með miklum ágætum, einnig hafa fyrirtæki tekið okkur vel í sambandi við auglýsingaspjöld.  Slíkt er ómetanlegt og hvetjandi fyrir okkur, sem starfa í stjórn knattspyrnudeildar KA.  Við finnum að við höfum meðbyr.
 
KA-lagið hefur verið endurútgefið og útkoman er svo góð að ólíklegasta fólk heyrist raula ,,við viljum sigur í þessum leik”. Jóhann ,,minn” Kristinsson  á mikið lof skilið fyrir hans miklu vinnu í því máli.
 
Ennig vil ég að þakka öllum þeim í KA-fjölskyldunni sem lagt hafa hönd á plóginn á Akureyrarvelli sl. daga, en afrakstur þeirrar miklu vinnu njótum við á leiknum í kvöld og auðvitað alltaf hér eftir.
 
KA-fjölskyldan er mögnuð, það veit ég, kynntist því virkilega vel sl. haust við fráfall systur minnar. Þá fann ég  fyrir þeim mikla hlýhug sem í þessari fjölskyldu býr.  Í kvöld vil ég fá að gleðjast með þessari sömu KA-fjölskyldu, gleðjast yfir sigri KA gegn Víkingi á okkar glæsilega heimavelli.
 
Áfram KA.
 
Gunnar Níelsson
Formaður knattspyrnudeildar KA.