Gunnlaugur: Betri bragur en á sama tíma í fyrra

27.11.2011
Gunnlaugur: Betri bragur en á sama tíma í fyrra
Nú þegar mánuður er liðinn af undirbúningstímabilinu sló heimasíðan á þráðinn til Gunnlaugs Jónssonar, þjálfara og spurði hann út í byrjunina. Gulli er ánægður með hópinn sem hann hefur í höndunum og telur að betri bragur sé á þessu en á sama tíma í fyrra „Mér líst mjög vel á hópinn, nú höfum við samanburð miðað við sama tíma í fyrra og það er betri bragur á þessu,"  sagði Gulli 

Síðan tímabilinu lauk í haust hafa tveir leikmenn gengið til liðs við félagið þeir Gunnar Valur frá Fjölni og Bjarki Baldvinsson frá Völsung

 „Ég er mjög ánægður með þá, þeir æfa í borginni og komu norður fyrir 3 vikum og voru þá langa helgi með okkur. Þeir eiga báðir eftir styrkja okkur mikið. Svo má ekki gleyma því að Brian ákvað að semja við okkur og það var ekki sjálfgefið. Svo höfum við endurheimt Hauk Hinriks úr láni og þar gekk honum vel enda kosinn leikmaður ársins hjá Völsungi.  Það sem við horfum líka á er að þeir ungu strákar sem fengu umtalsverða reynslu í sumar stigi skrefið fram á við og munu gera alvöru atlögu að því að gera betur á næsta tímabili."  

En býst Gulli við því að styrkja liðið eitthvað frekar?

„Já ég býst við því, við þurfum að styrkja sóknarþáttinn". 

Mikið hefur verið lagt upp úr unglingastarfi KA undanfarin ár og fjölmargir efnilegir strákar í 2. og 3. flokki. Aðspurður sagði Gulli að þessir strákar komi til með að fá tækifærið á undirbúningstímabilinu til að sýna sig og sanna.

„Það munu strákar úr 2. flokki fá séns í þremur æfingaleikjum sem framundan eru. Við spilum við Dalvík 2. des, heimsækjum Skagann og spilum við heimamenn 10. des og við ljúkum haustdagskránni í Boganum 17. des gegn Tindastóli. Svo má ekki gleyma því að við spilum á tveimur liðum í Soccerade-mótinu þannig að þar munu margir strákar fá tækifæri."

Að lokum var Gulli spurður hvernig tilfinningu hann hefði fyrir átökunum framundan

„Ég hef mjög góða tilfinningu fyrir þeim," svaraði Gulli þjálfari
Til baka