Gunnlaugur: Mjög jákvætt að halda hreinu

13.05.2011
Gulli var ánægður með stig úr fyrsta leik
Gulli var ánægður með stig úr fyrsta leik
KA gerði markalaust jafntefli gegn Leikni fyrr í kvöld. Heimasíðan heyrði í manninum í brúnni eftir leik, sem var sáttur með stig á erfiðum útivelli. “Heilt yfir var ég sáttur með spilamennskuna, við vorum betri aðilinn í fyrri hálfleik og áttum klárlega að skora þá,” sagði Gulli og hélt áfram: “Í þeim síðari, komust Leiknismenn betur inn í leikinn og áttu þá hættulegar sóknir. En ég held að þetta hafi verið sanngjarnt.” 

Það gerist ekki oft að KA haldi hreinu, hvað þá á útivelli, en það gerðist í kvöld, kannski þó vandamál að KA átti í erfiðleikum með að koma boltanum yfir línuna, eða hvað? “Það er mjög jákvætt að við skyldum halda hreinu og við fengum tækifæri til að skora, en það verður ekkert vandamál í næstu leikjum,” sagði Gulli bjartsýnn á að mörkin komi.

Eins og fyrr hefur komið fram eru talsverðar breytingar á liðinu frá síðasta keppnistímabili og smá basl var á vörninni framan af undirbúningstímabilinu, en hún hefur slípast vel til að undanförnu og þeir Hafþór og Boris eru að ná vel saman. “Já, þeir voru traustir og eiga bara eftir að verða betri. Sandor stóð vaktina vel í seinni hálfleik en það var mjög góð mynd á liðinu í dag. Menn að vinna hver fyrir annan og sýndu mikla samstöðu,”  sagði Gulli og bætti við að liðið væri orðið að fínni blöndu sem væri að virka ágætlega.

ÁFRAM KA

 

 

 

Til baka