Haukur Hinriksson: Svekkjandi að geta ekki tekið öll stigin

- Valinn maður leiksins af KA-mönnum og fær út að borða á Strikið
Haukur Hinriksson hinn ungi miðvörður KA-liðsins var að vonum svekktur eftir leikinn gegn Gróttu í kvöld. Hann skoraði gott skallamark eftir horn en skömmu síðar eftir mikinn klaufagang í vörninni jöfnuðu gestirnir og þar við sat. Haukur var valinn maður leiksins og fær út að borða á Strikið.

Haukur gekk upp úr öðrum flokki í fyrra og steig sín fyrstu skref með meistaraflokki síðasta sumar en núna hefur hann verið fastamaður í liðinu síðan í vetur.

,,Ég er svekktur með að við höfum ekki náð að landa stigunum þremur. Annars  spiluðum við ágætlega á köflum en ég veit að liðið getur miklu betur," sagði Haukur eftir leik.
Haukur hefur nú skorað tvö keimlík mörk úr hornum í fyrstu tveimur leikjum sumarsins.,,Það er alltaf gaman að fá tækifæri til að koma fram í hornum og auðvitað þegar maður fær tækifærið reynir maður eins og maður getur að koma boltanum í netið."

Haukur mun keppa á móti tvíburabróðir sínum, Hinriki, á mánudaginn þegar að KA mætir Draupni í Boganum. Haukur hafði eftirfarandi að segja um viðureignina. ,,Það er í fyrsta skipti sem við keppum gegn hvorum öðrum en við höfum ávallt verið í sama liðinu. Ég vona að hann verði settur á mig í hornum svo það séu meiri líkur á að ég skori. Margir félagar mínir eru einnig í liði Draupnis þannig vonandi verður þetta skemmtilegur leikur eins og bikarleikir eru oftast.  Að lokum vonast ég til að sjá sem flesta KA-menn í Boganum á mánudaginn.“