Í þá gömlu góðu daga: Palli Gísla í KA?! (Mynd)

Nú kynnum við til leiks nýjan lið hér á KA - síðunni sem ber nafnið "Í þá gömlu góðu daga". Eins og nafnið gefur til kynna verður ferðast aftur í sögu KA sem er löng og glæsileg. Til halds og trausts eru bækurnar "Saga KA" sem allir KA menn ættu að eiga, en þær fást í KA - heimilinu. En nóg um það, við ætlum að hverfa 19 ár aftur í tímann til ársins 1992. Það ár lék nefnilega Páll Viðar Gíslason, sem er einn nafntogaðasti Þórsari bæjarins og nú þjálfari m.fl. karla Þórs, með KA!

Árið 1992 var að mörgu leyti minnistætt í sögu KA. Við komumst í fyrsta skipti í bikarúrslitaleik, gegn Val. Við töpuðum eins og frægt er, en þegar 7 sekúndur voru eftir af leiktímanum fengum við á okkur jöfnunarmark eftir að hafa verið yfir allan leikinn, .... við töpuðum í framlengingu. Síðan þá hafa sumir KA menn ekki geta hustað á þetta lag. Einnig féll liðið úr úrvalsdeildinni eftir að hafa átt nokkur góð ár þar.

Annað er merkilegt við þetta ár, en þetta ár lék enginn annar en Páll Viðar Gíslason með KA. Palla þekkja flestir Akureyringar, enda frábær íþróttamaður þar á ferð sem spilaði bæði hand- og fótbolta. Palli er einnig einn af nafntoguðustu Þórsurum bæjarins og frétti undirritaður það í stól hjá rakara út í bæ að í dag sé hann ekkert sérstaklega hrifinn af því að þessi tími sé rifjaður upp. Því er um að gera að skella hér inn einni góðri liðsmynd þar sem Palli sést í hinum fallega KA-búningi, sem þá var frá ADIDAS.




Palli vígalegur í (að því er virðist) gulu og bláu! :-)