KA mætir Víkingi R í Lengjubikarnum

KA mætir Víkingi Reykjavík í Lengjubikarnum laugardaginn 17. mars nk. kl. 15.00 í Boganum. Þetta er fjórði leikur KA-liðsins í þessu móti, en áður hefur KA tapað fyrir úrvalsdeildarliðum Skagamanna og Stjörnunnar en unnið 1. deildarlið ÍR.

Víkingur R er með reynsluboltann Ólaf Þórðarson í brúnni. Liðið hefur spilað tvo leiki í Lengjubikarnum og unnið þá báða - gegn Keflavík í fyrstu umferð og síðan Tindastóli. Víkingsliðið er blanda af ungum og efnilegum strákum, t.d. Patrik Snær Atlason, Davíð Örn Atlason og Viktor Jónsson, og reynsluboltum á við Helga Sigurðsson, Hjört Júlíus Hjartarson og Reyni Leósson.

Sem fyrr gerir meiðsladraugurinn okkar liði lífið leitt. Þannig verða í það minnsta Elmar Dan og Jóhann Örn ekki með vegna meiðsla og þeir Ævar Ingi Jóhannesson og Fannar Hafsteinsson verða á landsliðsæfingum U-17 landsliðsins í Reykjavík, en liðið fer til Skotlands á mánudag til þess að taka þátt í milliriðli Evrópumótsins í knattspyrnu.