KA sigraði Fram í Lengjubikarnum

KA hafði sigur á Fram í Lengjubikarnum í Boganum í dag með einu marki gegn engu. Markið skoraði Fannar Freyr Gíslason á 13. mínútu. Í síðari hálfleik misstu KA-menn Hallgrím Mar af leikvelli eftir að hann fékk gula spjalið með tveggja mínútna millibili, á 51. og 53. mínútu. KA lék því einum manni færri bróðurpart síðari hálfleiks.

 

Sigurinn á Fram var góður vinnusigur. Strákarnir unnu hver fyrir annan allan tímann og þéttu raðirnar vel eftir að Hallgrímur Mar fór útaf. Og Sandor átti nokkrar frábærar vörslur í seinni hálfleik.

Þegar á heildina er litið var KA-liðið að spila vel í þessum leik, var mjög skipulagt og agað í öllum sínum aðgerðum. Vissulega skall hurð nærri hælum í tvígang undir lok leiksins - boltinn small í stöng og þverslá KA-marksins, en inn fór boltinn ekki og góður sigur KA í höfn.