Umfjöllun: KA - Fjarðabyggð

Fyrsti leikur sumarsins fór fram í Boganum í gær þar sem KA tók á móti Fjarðabyggð. Grasvellirnir eru ekki orðnir nægilega góðir og því var keppt innandyra á gervigrasinu  í Boganum.

KA 2 – 2 Fjarðabyggð
0-1 Guðmundur Atli Steinþórsson (´3)
1-1 Arnar Már Guðjónsson (´13)
2-1 Steinn Gunnarsson (´57)
2-2 Vilberg Marinó Jónasson (´79)

Umfjöllun á Fótbolta.net
Leikskýrslan á KSÍ

---

Varamenn: Steinþór Már (M), Haukur Heiðar(Dean, 72mín), Hjalti Már(Steinn, 69mín), Þórður Arnar, Sveinn Elías Jónsson(Andri Fannar, 79mín)

---

Vinir Sagga voru að sjálfsögðu mættir og sungu söngva og studdu frábærlega við bakið á liðinu.

Fjarðabyggð mættu ákveðnir til leiks og skoruðu strax á þriðju mínútu þegar Guðmundur Atli Steinþórsson komst einn í gegn og skoraði framhjá Sandor í markinu. KA-menn virtust ekki vera mættir til leiks og opnaðist vörnin mikið þegar Guðmundur slapp í gegn.

KA-menn voru hins vegar ekki lengi að svara fyrir sig en á þrettándu mínútu kom jöfnunarmarkið. Þar var að verki Arnar Már sem skoraði í sínum fyrsta deildarleik eftir flottan undirbúning Dean og Inga. Ingi tók aukaspyrnu stutt út á vinstri kantinum upp á Dean sem sendi fyrir beint á kollinn á Arnari sem kláraði með góðum skalla.

Eftir þetta róaðist leikurinn en á 40. mínútu var Andri Fannar við það að sleppa í gegn en markvörður Fjarðabyggðar kom út á móti honum og truflaði hann en Andri potaði boltanum framhjá honum. Boltinn endaði hins vegar hjá Almarri sem á skot framhjá úr dauðafæri. Eftir þetta gerðist fátt markvert og dómarinn flautaði til hálfleiks.

Seinni hálfleikur byrjaði eins og sá fyrri endaði en á 57. mínútu slapp Dean í gegn og skaut yfir markmanninn sem hafði komið langt út úr markinu. Haukur Ingvar fyrrum varnarmaður KA og núverandi fyrirliði Fjarðabyggðar náði á ævintýralegan hátt að bjarga á línu. Andri Fannar náði boltanum þó og renndi  honum út á Stein sem skaut góðu skoti upp í fjærhornið og staðan orðin 2-1.

Eftir markið voru KA-menn mjög líflegir og áttu marga góða spretti. Á 61. vann Almarr boltann af varnarmönnum Fjarðabyggðar en skot hans fór rétt framhjá úr vítateignum.

Á 79. mínútu áttu KA-menn skyndisókn, Haukur Heiðar nýkominn inn sem varamaður bar boltann upp, sendi upp í hornið á Almarr sem reyndi að koma boltanum fyrir en markmaður Fjarðarbyggðar varði boltann út í teiginn þar sem Haukur átti skot en aftur varði Srdjan Rajkovic.

Eftir það geystust Fjarðabyggð upp í sókn þar sem varnarmenn KA misreiknuðu fyrirgjöf frá hægri og inn í teiginn var mættur Vilberg Jónsson sem skoraði fyrir Fjarðabyggð. Tvö klaufaleg mörk komin og var vörnin ekki á tánum í mörkunum tveimur.

Eftir markið skiptust liðin á að eiga sóknir og var leikurinn mjög opinn. Sveinn Elías átti skot rétt yfir úr dauðafæri á 86.mínútu en hann hafði komið inn á fyrir Andra rétt áður. Leikurinn var mjög fjörugur undir lokin og hefðu bæði lið getað klárað leikinn á lokamínútunum, en hvorugu liðinu tókst að skora og fyrsti leikur sumarsins endaði því með jafntefli.

KA-menn voru að spila fínan fótbolta á köflum og hefðu alveg eins getað unnið þennan leik. Þeir fengu fín færi en náðu ekki að klára þau. Vörnin virkaði klaufaleg í mörkunum og er það vonandi ekki það sem koma skal í sumar.

Næsti leikur er í Víkinni gegn Víkingum Reykjavík á sunnudaginn og ljóst er að þar verður um hörkuleik að ræða þar sem ekkert verður gefið eftir en Víkingum er spáð toppsæti deildarinnar.

- davíð rúnar bjarnason