Knattspyrnudeild semur við Gauta Gautason

Undirritaður hefur verið samningur knattspyrnudeildar og miðvarðarins Gauta Gautasonar sem er uppalinn KA-strákur og hefur unnið sér sæti í U-17 landsliði Íslands. Samningurinn er til ársloka 2014.

Gauti Gautason er fæddur 15. mars 1996 og því sextán ára gamall. Hann var einn af lykilmönnum í sterku liði KA í þriðja flokki sl. sumar og einnig spilaði hann marga leiki í 2. flokki KA á liðnu sumri. Hann spilaði sig inn í landsliðshóp Íslands - U-17 - sem tók þátt í Norðurlandamótinu í Færeyjum í ágúst og sl. föstudag kom hann frá Möltu þar sem íslenska landsliðið spilaði í undanriðli Evrópumótsins og lenti í þriðja sæti eftir töp gegn Portúgal og Noregi en sigur á Möltu. Í öllum þremur leikjunum á Möltu var Gauti í byrjunarliði Íslands, spilaði þá til enda og stóð sig mjög vel.