Knattspyrnuskóli Arsenal á KA svæðinu næsta sumar

Yngriflokkaráð og knattspyrnuskóli Arsenal, Arsenal soccer school, hafa samið um að í júní næsta sumar verði Arsenal með 5 daga námskeið á KA svæðinu. Skrifað var undir samning þess efnis í dag, 20. október. Skólinn verður fyrir iðkendur í 5., 4. og 3. flokki og að sjálfsögðu bæði fyrir stráka og stelpur.

Einungis eru 200 pláss í boði. Skólinn verður opinn krökkum af öllu landinu á meðan pláss leyfir.
Arsenal soccer school mun senda 4 þjálfara sem munu hafa yfirumsjón með námskeiðinu en þeim til aðstoðar verða þjálfarar frá bæði KA og Þór. Auk þess munu margir gestaþjálfara kíkja í heimsókn, s.s landsliðþjálfararnir Sigurður Ragnar og Ólafur Jóhannesson, þjálfararnir Þorvaldur Örlygsson og Ólafur Kristjánsson auk Arons Einars Gunnarssonar, atvinnumanns hjá Coventry.

Yngriflokkaráð er að sjálfsögðu í skýjunum yfir þessum samningi og mikil gleði ríkjandi.
En svona verkefni gengur ekki upp nema með aðstoð góðra aðila. Norðlenska, Ölgerðin, Íslensk verðbréf, Sportver og Hótel KEA styrkja knattspyrnuskólann á ýmsan hátt og þökkum við þeim kærlega fyrir góðar viðtökur.

Knattspyrnuskóli Arsenal er í fremstu röð á Englandi og þar ræður fagmennskan ríkjum. Skólinn hefur verið starfræktur frá árinu 1985 og á orðið í nánu samstarfi við fjölmarga aðila á Bretlandseyjum og í öðrum löndum. Þetta er í fyrsta skipti sem skólinn er með námskeið hér á landi.

Í grunninn leggur skólinn áherslu á rétt hugarfar knattspyrnukrakka innan jafnt sem utan vallar. Að þáttakendur leggi sig fram í æfingum og í leikjum og beri virðingu fyrir samherjum, andstæðingum, þjálfurum og dómurum. Áhersla er lögð á fjölbreyttar æfingar, þar sem tækniæfingar eru ekki síst í forgrunni, rétt mataræði o.f.l. Þá er undirstrikað að knattspyrna er hópíþrótt og hver leikmaður er jafn mikilvægur í liðinu. En umfram allt sé knattspyrnan skemmtileg íþrótt og Knattspyrnuskóli Arsenal leggur ríka áherslu á að þáttakendur hafi gagn og ekki síður gaman af því að taka þátt.

Í byrjun desember næstkomandi verður byrjað að skrá þáttakendur á námskeiðið á Akureyri. Tilhögun skráningar verður nánar kynnt og auglýst síðar.