Náttúruhamfarir á KA-völlum

Það sem óttast var með vellina á KA-svæðinu er nú staðreynd. Ætla má að um 90% af vallarsvæðinu hafi kalið, sem er bein afleiðing af þeirri þykku klakahellu sem lá yfir öllu svæðinu meira og minna frá janúar og fram í apríl.

Sú rotnunarfýla sem fannst á KA-svæðinu í mars og apríl var greinilegt merki um að grassvörðurinn væri að kafna undir þykkri íshellunni. Tíðarfarið seinnipart vetrar hefur verið eins óhagstætt og hugsast getur hvað varðar klakamyndun á flata eins og KA-svæðinu – tíðar suðvestlægar áttir með þíðu og frosti á víxl sem gerði það að verkum að aldrei náði að þiðna ofan í grassvörðinn. Því miður er ljóst að enginn mannlegur máttur hefði getað komið í veg fyrir þetta mikla kal, sem óhætt er að segja að megi líkja við náttúruhamfarir.

En þá er spurningin hvernig bregðast skuli við. Engar töfralausnir eru til í þeim efnum, um það eru allir þeir sérfræðingar sem til hefur verið leitað sammála. Þessa dagana er verið að ljúka við að sá tveimur gerðum af grasfræi í svæðið og síðan er að sjálfsögðu borinn tilbúinn áburður á það, sömuleiðis sandur og þá verður farin sú nýja leið að bera kjötmjöl yfir allt svæðið, en það hefur gefið mjög góðan árangur þar sem það hefur verið notað, til dæmis á golfvellinum á Jaðri. Rétt er að vara fólk við því í næsta nágrenni KA-svæðisins að torkennileg lykt mun finnast frá svæðinu af kjötmjölinu í nokkra daga á meðan það er að fara niður í jarðveginn.  Síðan þarf að hlú að svæðinu í framhaldinu með því að vökva ótt og títt og vona síðan það besta. Og tíðarfarið þarf að verða gott til þess að þessar ráðstafanir beri árangur. Reyndar er spáin ekkert sérlega góð þegar líður á þessa viku. En þetta kuldakast mun ganga tiltölulega fljótt yfir og það hlýnar væntanlega á ný um næstu helgi.

Gunnar Jónsson, framkvæmdastjóri KA, segir afar erfitt að segja til um á hversu löngum tíma vellirnir nái sér á strik. Staðan sé vissulega óvenjulega erfið í ljósi þess gríðarlega kals sem hafi orðið á vallarsvæðinu, en allt verði að sjálfsögðu reynt til þess að flýta uppgræðslu vallanna sem kostur er. Gunnar segir að þær sértæku aðgerðir sem grípa þurfi til vegna þessa mikla kals hafi í för með sér umtalsverðan kostnaðarauka fyrir KA, sem megi áætla á aðra milljón króna.

Auk KA-svæðisins er Akureyrarvöllur sem kunnugt er í umsjón KA. Þar er sömuleiðis allt komið á fullt við að gera völlinn eins góðan og mögulegt er. Hluti vallarins hefur kalið illa, rétt eins og KA-svæðið, vegna klaka sem lá á honum vikum saman. En önnur svæði vallarins eru smám saman að ná sér á strik og er þess vænst að hann verði í þokkalegu ástandi þegar líður á mánuðinn. Nú þegar er búið að sá í völlinn, bera á hann áburð og sanda og sömuleiðis var brugðið á það ráð, rétt eins og á KA-svæðinu, að dreifa kjötmjöli yfir vallarsvæðið.