Soccerade: Sigur í opnunarleiknum - Umfjöllun og myndir!

KA-menn léku gegn Völsungum í opnunarleik Soccerademótsins um helgina og hefndu fyrir ófarirnar síðasta vetur gegn Húsvíkingum með 2 - 0 sigri.

Síðasta vetur í Soccerademótinu töpuðu KA-menn í vítaspyrnukeppni í úrslitaleik gegn Völsungum í hörkuleik en núna höfðu þeir gulklæddu yfirhöndina.

Sævar Geir Sigurjónsson var á leiknum og mundaði vélina. Myndasafnið má sjá með því að smella hér.


Völsungur 0 - 2 KA
0-1 Haukur Heiðar Hauksson (39)
0-2 Arnór Egill Hallsson (84)



Varamenn: Jón Heiðar Magnússon(Ívar 76. mín), Andrés Vilhjálmsson(Jakob 61. mín), Arnór Egill Hallsson(Janez 76. mín), Fannar Hafsteinsson, Ómar Friðriksson(Túfa 76. mín), Steinn Gunnarsson, Sigurjón Fannar Sigurðsson.

KA-menn byrjuðu leikinn töluvert betur en Völsungar og fengu tvö fín færi til að brjóta ísinn en markvörður Völsunga var vel vakandi. Völsungar áttu svo aukaspyrnu í slá áður en KA-menn komust yfir undir lok fyrri hálfleiks. Eftir hornspyrnu reyndu Völsungar að hreinsa frá markinu en boltinn fór í Hauk Heiðar á marklínunni og inn. Ódýrt en telur eins og öll önnur mörk og KA-menn með 1-0 forystu inn í hálfleikinn.

Síðari hálfleikurinn byrjaði ekki eins vel og voru Völsungar nokkuð sprækir fyrsta stundarfjórðunginn áður en KA náði aftur tökum á leiknum.

Annað markið kom á 84. mínútu en þá endaði vel útfærð skyndisókn með fyrirgjöf út í teig frá Hauki Heiðari þar sem Arnór Egill kom á ferðinni og kláraði vel.

Niðurstaðan 2-0 sigur og fín byrjun á mótinu. Næsti leikur er laugardaginn 22. janúar gegn nýsameinuðu liði Tindastóls/Hvatar.