Srdjan Tufegdzic ráðinn aðstoðarþjálfari mfl. kk í knattspyrnu

Srdjan Tufegdzic (Túfa) hefur verið ráðinn aðstoðarþjálfari mfl. KA í knattspyrnu og verður hann því hægri hönd Bjarna Jóhannssonar við stjórnun meistaraflokks í þeim átökum sem framundan eru í vetur og næsta sumar. Túfa hefur nú þegar hafið störf.

Eftir síðasta tímabil ákvað Túfa að leggja skóna á hilluna eftir sex farsæl ár í KA-treyjunni. Hann kom fyrst til KA fyrir tímabilið 2006 og síðan hefur hann spilað 106 leiki fyrir félagið.

Í fyrra og í ár hrjáðu þrálát meiðsli Túfa sem leiddu loks til þess að hann ákvað að hætta að spila.

Fyrr á þessu ári lauk Túfa við UEFA-A próf í þjálfun. Hann hefur undanfarin ár þjálfað yngri flokka KA, bæði drengi og stúlkur, og mun hann eftir sem áður halda áfram yngriflokkaþjálfuninni, þó svo að hún verði eitthvað minni að umfangi en verið hefur.

Túfa er boðinn velkominn til starfa sem aðstoðarþjálfari mfl. kk. í KA.